U Minsku prachodziać pieratrusy ŭ anarchistaŭ
Ranicaj 26 vieraśnia supracoŭniki kryminalnaha vyšuku pravodziać šerah pieratrusaŭ u sacyjalnych aktyvistaŭ Minska. Pravaabaroncam viadoma, što vobšuk prachodzić u domie vykanaŭčaha dyrektara hramadskaha abjadnańnia «Ekadom» Maryny Dubinaj, žurnalistki-fryłansiera Maryny Kastylančanka, niekatorych inšych aktyvistaŭ anarchisckaha ruchu. Padčas vobšuku kanfiskavanyja kampjutary, srodki mabilnaj suviazi i litaratura. Pra zatrymańni pakul nieviadoma, paviedamlaje pravaabarončy centr «Viasna».
U sacyjalnych sietkach paviedamlajuć pra pieratrus u Maryny Dubinaj nastupnaje. «U 7.10 ranicy supracoŭniki milicyi zajšli ŭ dom, dzie na toj čas znachodziłasia piać čałaviek. Pieratrus da hetaha času nie skončany».
Mahčyma, vobšuki źviazanyja z kryminalnaj spravaj pa častcy 2 art. 339 KK (chulihanstva, ździejśnienaje hrupaj asobaŭ), zaviedzienaj pa fakcie padpału kaktejlami Mołatava biłborda ŭ Ivacevičach 28 lipienia. Pa hetaj kryminalnaj spravie spravie prachodziać dvoje sacyjalnych aktyvistaŭ: žychar Ivacevič Ihar i minčuk Kirył Alaksiejeŭ, jaki źmieščany ŭ Baranavicki SIZA. Tady hrupa nieviadomych anarchistaŭ spaliła rekłamny biłbord. Na biłbordzie było napisana: «Siła zakona ŭ jaho vykanańni». Paźniej videa padpału patrapiła ŭ sacyjalnyja sietki.
Pravaabaroncy «Viasny» vyśviatlajuć hetuju infarmacyju i adsočvajuć siońniašniuju situacyju.
