Usio, što vy nie viedali pra ślinhi — VIDEAinstrukcyja, jak prymatać dzicia
Maderatarka biełaruskaj supołki ślinhamam, maładaja i aktyŭnaja maci dźviuch dačok Jula Babrova raspaviała, navošta nasić dziaciej u ślinhach i jak heta rabić pravilna.
«Nina»: Čamu maładyja mamy nosiać dziaciej u ślinhach?
Jula Babrova: Bo dzieci zaŭsiody chočuć być bližej da maci i ich davodzicca nasić na rukach ci jašče niejak, a ślinh — heta fizijałahičny sposab našeńnia.
Raniej byli raspaŭsiudžanyja kienhuruški. Ale kali praviali bazavyja ekśpierymienty z udziełam artapiedaŭ i inšych daktaroŭ, kab vyśvietlić, nakolki kienhuruški zručnyja, stała zrazumieła, što zusim nie. Pasprabujcie sami pavisieć hadzinu ŭ pozie, kali pachavaja vobłaść stanovicca aporaj dla ŭsiaho cieła!
Zatoje raspaŭsiudzilisia ślinhi i inšyja erhanamičnyja pieranoski.
«Nina»: Adkul vy daviedalisia pra ślinhi?
Jula B.: U studenctvie ja viała ŽŽ i znajšła tam ślinhamamu Iru Aviŭ — jana vykładała fota z dačkoj u ślinhu ŭ roznych miescach svajho horada. Ja tady padumała: «Jak heta zručna! Kali ŭ mianie buduć dzieci, to abaviazkova budu ich tak nasić».
«Nina»: Jakaja była reakcyja vašych maci i babuli na ślinh, ci byli jany suprać?
Jula B.: Nu, im treba było pryzvyčaicca. Ale ja hetaha vielmi chacieła, navat muža zachapiła svaim entuzijazmam. Jon byŭ vielmi-vielmi «za», bo lubić usialakija zručnyja štuki. Ale, kaniečnie, treba być dosyć upartym, kab pierakanać svaich blizkich, što heta dobra. Maja mama ŭ vyniku davoli chutka sa mnoj zhadziłasia, što heta zručna, ale saśpieła namatać na siabie ślinh tolki kali naradziłasia druhaja ŭnučka. Daša spakojna zasynała na babuli.
«Nina»: Što kazali daktary ŭ paliklinicy?
Jula B.:
Ź pieršaj dačkoj ja była vielmi niaŭpeŭnienaja: kali my išli ŭ palikliniku, to pierad uvachodam ci na pieršym paviersie razmotvała ślinh i chavała ŭ pakiet.
U mianie nie było sumnievaŭ, što ślinh — heta pravilna, važna i karysna dla majoj dački, bo jana była niedanošanaja, a takim dzieciam patrebny mietad kienhuru «skura da skury». Nasiła Alenku tak doma ad samaha pačatku, ale bajałasia, što nam niešta skažuć na pryjomie ŭ piedyjatra. Z druhoj dačkoj ja ŭžo spakojna chadžu paŭsiul. Zdarajecca, da nas padychodziać ciažarnyja, cikaviacca, tady ja im daju vizitoŭki našaj ślinhasupolnaści.
«Nina»: Ci byli niepryjemnyja reakcyi ludziej?
Jula B.: Mocna zaležyć ad taho, jak sama mama da hetaha stavicca. Kali jana ŭpeŭnienaja ŭ sabie, spakojnaja, to navat kali ŭ jaje dzicia kryčyć, nichto ničoha joj nie skaža. A voś kali maci panikuje, pieražyvaje, to abaviazkova znojdzie svajho kamientatara. Nijakich niehatyŭnych reakcyj u nas nie było.
«Nina»: A ŭ vas jość vazok? Ci ślinh — heta radykalnaja pazicyja?
Jula B.: Kali Alency było paŭhoda, my nabyli vazok.
Va ŭsim treba prytrymlivacca bałansu — heta nie relihija, nie siekta.
Kali zručna z vazkom, to dobra, choć zusim maleńkich, kaniečnie, praściej da siabie prymatać. Nie treba ciahać vializny vazok, nie treba apranać dzicia ŭ zimovuju vopratku, možna prosta navierch na ślinh apranuć ślinhakurtku. Tyja, chto sprabavaŭ apranuć dziciaci ŭ zimovaje, vynieści vazok na vulicu pa leśvicy ci navat spuścić na lifcie, viedajuć, nakolki praściej sa ślinham.
«Nina»: Ci šmat ludziej u ŽŽ-kamjunici ślinhamam Biełarusi?
Jula B.: Aktyŭnych — čałaviek 15. Dzieci vyrastajuć, niechta prychodzić, niechta sychodzić, niechta viartajecca z druhim, trecim dziciom.
U ŽŽ nie ŭsim zručna adsočvać infarmacyju, tamu viasnoj ja zaviała jašče staronku na fejsbuku i ŭ instahramie @belslingomamy.
«Nina»: Jak baviać čas ślinhamamy ŭ vašaj supolnaści?
Jula B.: My prosta źbirajemsia razam i kudy-niebudź chodzim, naprykład, u muziei. Ciapier źjaviłasia bolš «čajłd-frendli» miescaŭ, my naviedvajem pravieranyja.
«Nina»: Jakija asnoŭnyja strachi, źviazanyja sa ślinham, jość u navičkoŭ?
Jula B.:
- A raptam dziciaci tam niazručna, a ja ź jaho ździekvajusia?
- A raptam prymatanaje dzicia zakryčyć u hramadskim miescy, i ja nie budu viedać, što rabić?
- Ci vytrymaje ślinh majo dzicia, ci nie parviecca?
- 4,5 mietra tkaniny… A raptam ja ŭ joj zabłytajusia?
«Nina»: Ciapier prachodzić tydzień ślinhanašeńnia, što płanujecca?
Jula B.: U subotu projdzie ślinhaparad. A na nastupnym tydni my praviadziom ślinhabarachołku.
Bolš infarmacyi možna pačytać voś tut.
