Łukašenka na vučeńniach: «Kali snarad u adno miesca — dvuch adrazu nie stanie»
Fota Darji Burakinaj, Tut.by
Sproby dyskredytacyi biełaruska-rasijskich vučeńniaŭ «Zachad-2017» byli vielmi nieprafiesijnymi, usie vojski paśla vučeńniaŭ viernucca ŭ miescy pastajannaj dysłakacyi, zajaviŭ 20 vieraśnia kiraŭnik Biełarusi Alaksandr Łukašenka.
«Nie razumieju, navošta było dyskredytacyju vučeńniaŭ rabić. Choć by navučylisia heta rabić prafiesijna», — cytuje słovy kiraŭnika krainy Tut.by.
«Što b źmianili kala 5 tysiač rasijskich vajskoŭcaŭ, jakija pavinny byli ŭziać udzieł u vučeńniach na terytoryi Biełarusi? — zadaŭ Łukašenka rytaryčnaje pytańnie. — 75 tysiač — armija Biełarusi. I ŭ vypadku napadu z zachodniaha napramku, pierš za ŭsio pačynaje vajnu biełaruskaje vojska. I praź niekatory čas siudy ściahvajuć uzbrojenyja siły Rasii. Kali my takija ahresary, to Zachad pavinien bajacca Biełaruś ź jaje 75-tysiačnym vojskam».
Kiraŭnik krainy padkreśliŭ, što kali Biełarusi treba budzie pryciahnuć rasijanaŭ sabie na dapamohu, to heta budzie zroblena imhnienna.
«I my na hetych vučeńniach heta adpracavali. My heta nie ŭtojvajem. Ale napadać my ni na kaho nie źbirajemsia. Ale kali nam daduć pa mordzie, my adkažam», — zajaviŭ kiraŭnik dziaržavy.
Jon taksama padkreśliŭ, što ŭsie zadačy, jakija stavilisia pierad udzielnikami vučeńniaŭ, vykananyja.
«Niachaj žyvuć spakojna na Zachadzie. My nie budziem vajavać suprać kaho b tam ni było, kali nas nichto nie kranie. Hetaja samaja vialikaja harantyja.
My napakutavalisia ad vajny. My — nie ahresiŭnaja dziaržava. My nie chočam vajavać. Z našaj ziamli nikoli nie zychodzili vojny. My tolki ad ich pakutavali. Ja jak prezident chaču, kab naš narod razumieŭ, što kali raptam niešta zdarycca, to ŭ nas jość, čym abaranić svaje siemji i dziaciej. Ja chaču zvyčajnaj čałaviečaj biaśpieki. I nijakaj ataki ad nas nie čakajcie. Asabliva va Ukrainie», — reziumavaŭ Łukašenka.
Łukašenka skazaŭ, što kiraŭniki Biełarusi i Rasii zahadzia damovilisia ab asobnym ŭdziele ŭ vučeńniach «Zachad-2017».
«Pieršapačatkova my płanavali, što budziem razam u Barysavie. Ale potym vyrašyli, što Pucin na poŭnačy ŭ Leninhradskaj vobłaści, a ja ŭ centry. Ja rady, što mnie davieryli asnoŭnuju placoŭku vučeńniaŭ», — zajaviŭ jon.
«Kali snarad u adno miesca — dvuch adrazu nie stanie», — pažartavaŭ Łukašenka.
Kiraŭnik dziaržavy dadaŭ, što tyja mety, jakija stavilisia pierad vučeńniami, dasiahnuty, padkreśliŭšy, što ŭdzielniki «pakazali zdolnaść našych uzbrojenych siłaŭ Biełarusi i Rasii pa abaronie sajuza i intaresaŭ našych dziaržaŭ».
«Heta sapraŭdy była demanstracyja našych mahčymaściaŭ. Biez hetaha nielha. Ja navat nie mahu va ŭłaścivaj sabie maniery vyznačyć niedachopy hetych vučeńniaŭ. Usio było na vysokim uzroŭni. I hetyja vučeńni nie nasili pakazušny charaktar. Heta byli absalutna praktyčnyja dziejańni. Takija, jakija buduć, kali, nie daj boh, pačniecca vajna», - zajaviŭ Łukašenka.
Fota Darji Burakinaj
***
Kiraŭnik krainy ŭ apošni dzień vučeńniaŭ «Zachad-2017» pabyvaŭ na palihonie «Barysaŭski», prybyŭšy na palihon na viertalocie. Z naziralnaj placoŭki jon acaniŭ «pole boju» nie praź binokl, a praz ekran manitora, karcinku na jaki pieradavaŭ zapuščany bieśpiłotnik - biełaruskaj raspracoŭki, ŭdakładnili vajskoŭcy.
Łukašenka ahledzieŭ ruchomy punkt upraŭleńnia kamandujučaha RHV (s). Hety braniravany aŭtamabil ajčynnaj vytvorčaści abstalavany samymi sučasnymi srodkami suviazi, jakija dazvalajuć kiravać vojskami niepasredna ŭ ruchu. «Małajcy! Za karotki pramiežak času zrabili dobruju sistemu», — adznačyŭ jon
Na palihonie adpracoŭvalisia ŭzhodnienyja dziejańni raznastajnych sił i srodkaŭ uzbrojenych sił Biełarusi i Rasii pa adbićci nastupu ŭmoŭnaha praciŭnika, praviadzieńni kontrataki i dalejšym jaho razhromu. U chodzie rozyhryšu taktyčnych epizodaŭ prachodzili aprabacyju novyja ŭzory ŭzbrajeńnia i vajennaj techniki abaronnaha siektara ekanomiki Biełarusi: lohkabraniavanych aŭtamabili «V1» (MZKC), bronietransparcior «Kajman», radyjoelektronnyja strelby dla baraćby z multykopterami (AAT «KB Radar»), a taksama madernizavanyja tanki T-72 BM3.
Razam z Alaksandram Łukašenkam za vučeńniami na palihonie nazirli dziaržsakratar Sajuznaj dziaržavy Ryhor Rapota, pasoł Rasii ŭ Biełarusi Alaksandr Surykaŭ. Čakałasia i prybyćcio ministra abarony Rasii Siarhieja Šajhu, pra heta zajaŭlali ŭ abaronnych viedamstvach dźviuch krain, adnak pa nieviadomaj pryčynie kiraŭnik Minabarony RF praihnaravaŭ naviedvańnie palihona «Barysaŭski».
