Łukašenka pra niebiaśpieku prysutnaści rasijskich vojskaŭ u Biełarusi: Treba supakoicca
Fota Darji Burakinaj
Alaksandr Łukašenka raić supakoicca tym, chto baicca prysutnaści na biełaruskaj terytoryi rasijskich vojskaŭ u chodzie sumiesnych vučeńniaŭ «Zachad-2017». Ab hetym kiraŭnik dziaržavy zajaviŭ žurnalistam paśla nazirańnia za chodam vučeńniaŭ.
Pradstaŭnik niamieckaha telebačańnia pacikaviŭsia, ci moža dać kiraŭnik biełaruskaj dziaržavy harantyju, što rasijskija vojski pakinuć terytoryju Biełarusi pa zaviaršeńni vučeńni. «Pa-mojmu, hetyja harantyi ŭžo dadzieny šmat razoŭ jašče da hetych vučeńniaŭ», - padkreśliŭ biełaruski lider.
Jon adznačyŭ, što i na papiarednija padobnyja vučeńni pryciahvalisia rasijskija vojski prykładna ŭ takoj ža kolkaści. «Treba supakoicca vašym siabram. Pieradajcie im: chaj žyvuć spakojna, my nie budziem vajavać suprać kaho b tam ni było, kali nas nichto nie budzie čapać. Heta samaja vialikaja harantyja», - zajaviŭ Łukašenka.
Što tyčycca prysutnaści rasijskich vojskaŭ, jon zapeŭniŭ, što praz tydzień hetaje pytańnie adpadzie samo pa sabie. «Vy nie chvalujciesia, my nie ahresiŭnaja dziaržava, my i tak napakutavalisia ad vajny, i vy taksama, choć vy i vajavali suprać nas, — skazaŭ kiraŭnik dziaržavy. — Tamu ni vy nie chočacie vajavać, ja dumaju, a my tym bolš nie chočam. My tolki-tolki adnavili davajenny ŭzrovień nasielnictva. Z našaj ziamli nikoli nie źnikali vojny. My tolki ad ich pakutavali».
Alaksandr Łukašenka dadaŭ, što choča, kab biełaruski narod razumieŭ, što ŭ vypadku čaho ŭ dziaržavie jość čym abaranić svaich ludziej i siamji. «Ja chaču zvyčajnaj čałaviečaj biaśpieki, da jakoj imknucca ŭsie dziaržavy. Nijakaj ataki vy ad nas nie čakajcie - ni ŭ Hiermanii, ni ŭ Polščy, ni ŭ krainach Bałtyi, a tym bolš u rodnaj Ukrainie», - padkreśliŭ jon.
