Vakoł śvietu za 79 dzion: novy rekord brytanskaha ravarysta
Ravyryst z Šatłandyi Mark Bomant ustalavaŭ novy suśvietny rekord, abjechaŭšy vakoł śvietu na rovary za 79 dzion. Dla hetaha jamu davodziłasia štodnia prajazdžać u siarednim pa 386 km, piša VVS.
JERA
34-hadovy spartsmien prybyŭ u Paryž na adzin dzień raniej za ŭstanoŭleny termin, pieraadoleŭšy ahułam 30 tysiač km. La Tryumfalnaj arki jaho čakaŭ natoŭp prychilnikaŭ.
U 2008 hodzie Bomant užo staviŭ suśvietny rekord: tady jon prajechaŭ vakoł śvietu za 194 dni. Adnak z tych časoŭ hety rekord byŭ pabity inšymi ravarystami: apošniaja kruhaśvietnaja viełavandroŭka doŭžyłasia 123 dni.
Kab pabić hety rekord, Bomant jechaŭ na rovary pa 16 hadzin u dzień, a spać jamu prychodziłasia tolki pa piać hadzin u sutki.
Jon pačaŭ svoj šlach 2 lipienia ŭ Paryžy i prajechaŭ praź Jeŭropu, Rasiju, Manholiju i Kitaj. Zatym jon pierasiok usiu Aŭstraliju, Novuju Ziełandyju i Paŭnočnuju Amieryku, paśla čaho vyjšaŭ na finišnuju pramuju, jakaja pralahała praz Partuhaliju, Ispaniju i Francyju.
U chodzie zajezdu Bomant taksama pastaviŭ rekord dla Knihi rekordaŭ Hiniesa: za najbolšuju kolkaść mil, pieraadolenych na rovary na praciahu miesiaca. Za hety pieryjad jon prajechaŭ ad Paryža da Pierta (Aŭstralija), pieraadoleŭšy adlehłaść u 11315 km.
«Heta było, biassprečna, samaje žorstkaje vyprabavańnie, praź jakoje kali-niebudź prachodziła majo cieła i moj mozh. Fizičnaja i maralnaja vytrymka była nieabchodnaja mnie kožny dzień, ale mianie atačała vydatnaja kamanda», — raspavioŭ spartsmien.
AFP
«Pośpiech kruhaśvietnaha padarožža za 80 dzion pakazvaje, što toje, što zdajecca niemahčymym, na samaj spravie mahčyma, i rassoŭvaje ramki sportu, jaki patrabuje vynoślivaści», — kaža Bomant.
Pavodle jaho słoŭ, za čas padarožža davodziłasia chutka pryvykać da roznych umoŭ klimatu i prajazdžać praz zusim nieznajomyja jamu terytoryi, takija jak Rasija i Manholija.
U paŭnočnym paŭšarji padarožniku davodziłasia jechać pry minusovych tempieraturach, a ŭ Paŭnočnaj Amierycy — dychać pavietram, zadymlenym u vyniku lasnych pažaraŭ.
Za čas padarožža Bomant dvojčy padaŭ z rovara, i paśla padzieńnia ŭ Rasii jamu była akazanaja terminovaja stamatałahičnaja dapamoha. Na praciahu ŭsiaho maršrutu jaho supravadžała kamanda padtrymki, u jakuju ŭvachodzili u tym liku miechanik, dyjetołah, lekar i mieniedžar.
Mark pačaŭ zajmacca viełasportam u 12-hadovym uzroście. Tady jon ździejśniŭ svajo pieršaje vialikaje padarožža, prajechaŭšy 233 kiłamietry pa Šatłandyi.
