17 vieraśnia pačynajecca aktyŭnaja faza vučeńniaŭ «Zachad-2017»
Sumiesnaje stratehičnaje vučeńnie ŭzbrojenych sił Biełarusi i Rasii «Zachad-2017» siońnia ŭstupaje ŭ aktyŭnuju fazu, paviedamlaje BiełTA. Ad 17 vieraśnia raspačynajecca druhi etap vučeńni, padčas jakoha buduć adpracavany pytańni kiravańnia vojskami (siłami) padčas viadzieńnia vajennych dziejańniaŭ pry adbićci ahresii suprać sajuznaj dziaržavy.
Na palihonach voinskija čaści i padraździaleńni rehijanalnaj hrupoŭki vojskaŭ (sił) adpracujuć viadzieńnie abarončaha boju, pošuk, błakavańnie i źniščeńnie niezakonnych uzbrojenych farmiravańniaŭ pry padtrymcy avijacyi.
Tak, na palihonie Ružanski siońnia zapłanavana praktyčnaje naniasieńnie avijacyjnaha ŭdaru z užyvańniem avijacyjnych srodkaŭ paražeńnia. Na Asipovickim palihonie 18 vieraśnia adbudziecca rozyhryš viadzieńnia boju pa ŭtrymańniu abarončych rubiažoŭ. Na nastupny dzień na palihonie Damanava budzie prademanstravana niasieńnie bajavoha dziažurstva padraździaleńniami supraćpavietranaj abarony.
Sumiesnaje stratehičnaje vučeńnie ŭzbrojenych sił Biełarusi i Rasii «Zachad-2017» pačałosia 14 vieraśnia. Vučeńnie budzie doŭžycca da 20 vieraśnia. Na terytoryi Biełarusi zadziejničany palihony Lepielski, Barysaŭski, Łośvida, Asipovicki, dva palihona VPS i vojskaŭ SPA - Ružanski i Damanaŭski, a taksama dva ŭčastki miascovaści ŭ Viciebskaj vobłaści - Dretuń i Hłybokaje.
U Rasii jano projdzie na palihonach Łužski, Struhi Krasnyja i Praŭdzinski u Kalininhradskaj, Leninhradskaj i Pskoŭskaj abłaściach.
Kolkaść asabovaha składu, jaki ŭdzielničaje ŭ vučeńni, składaje kala 12,7 tys. vajskoŭcaŭ. Pry hetym u Biełarusi, pavodle Minabarony, budzie zadziejničana kala 10,2 tys. čałaviek (ad Biełarusi - krychu bolš za 7 tys., Rasii - kala 3 tys.), 370 adzinak braniatankavaj techniki, u tym liku kala 140 tankaŭ. Taksama budzie vykarystana da 150 adzinak artyleryi i reaktyŭnych sistem załpavaha ahniu, bolš za 40 samalotaŭ i viertalotaŭ.
