U minskim kanfiskacie pradajecca «Bentli» za $163 tysiačy FOTA
Jość padazreńnie, što jano naležała biznesoŭcu Vitalu Arbuzavu.
U siekcyi pa prodažy aŭtamabilaŭ handlovaha domu «Uschodni» ŭ Minsku źjaviŭsia ŭnikalny aŭtamabil Bentley Brooklands 2008 hoda vypusku. Fatahrafii ŭ redakcyju abw.by dasłaŭ čytač.
Miarkujučy pa infarmacyi, pakazanaj na infarmacyjnaj tabličcy, aŭtamabil-kupe 2008 hoda vypusku z ruchavikom abjomam 6760 kub.sm abydziecca pakupniku ŭ 315 810 rub. Transpartny srodak atrymany pa akcie ad 16 žniŭnia 2017 hoda, heta značyć, u prodažy zusim niadaŭna.
Na sajcie handlovaha doma infarmacyja pra heta aŭto taksama jość. Tam skazana, što mašyna na chadu, abstalavanaja aŭtamatyčnaj karobkaj pieradač. Prabieh nidzie nie paznačany. Aŭto budzie pradavacca praz aŭkcyjon, jaki adbudziecca 25 žniŭnia.
Jość zdahadka, što aŭtamabil naležaŭ zatrymanamu pa abvinavačvańni ŭ niaspłacie padatkaŭ biełaruskamu biznesoŭcu, kiraŭniku Fenox Global Group Vitalu Arbuzavu, jaki akramia fijaletavaha Bentley Brooklands maje jašče i Bentley Mulsanne. Pačatkovaja cana ŭviezienaha ŭ krainu Brooklands składała 320.000 dalaraŭ.
Upieršyniu Bentley Brooklands byŭ pradstaŭleny na aŭtasałonie ŭ Ženievie ŭ 2007 hodzie. Kožny asobnik hetaj madeli źbiraŭsia ŭručnuju, usiaho było vypuščana 550 takich aŭtamabilaŭ. Cana kožnaha ekziemplara vyznačałasia indyvidualna - ad 200 000 da 400 000 jeŭra.
Vystaŭleny ŭ Minsku Bentley Brooklands možna nazvać samym darahim aŭtamabilem z usich, jakija pradavalisia kali-niebudź u minskim «kanfiskacie» (kala 163 tys. dalaraŭ pa kursie Nacbanka).
