Redki dla Biełarusi bahamoł prylacieŭ na bałkon šmatpaviarchovika ŭ Minsku FOTA
Bahamoły, jakija addajuć pieravahu bolš ciopłym krajam, usio čaściej traplajucca na vočy biełarusaŭ. Čytač «Našaje Nivy» padzialiŭsia fotazdymkam bahamoła, jaki prylacieŭ da jaho na bałkon na vośmym paviersie.
Letaś «NN» pisała pra vialikich pavukoŭ, jakich možna sustreć u lasach Biełarusi. Zhadvalisia i bahamoły. Mnohija miarkujuć, što źjaŭleńnie novych, nie charakternych dla našaje krainy, vidaŭ źviazanaje z paciapleńniem klimatu. Maŭlaŭ, kavuny z dyniami rastuć, voś i bahamoły źjavilisia.
Miž tym, hienieralny dyrektar Navukova-praktyčnaha centra pa bijaresursach NAN Biełarusi Aleh Baradzin u intervju greenbelarus.info padzialiŭsia dumkaj, što źmianieńni klimatu adbyvajucca, ale adnaznačna kazać pra niejkaje paciapleńnie nielha.
«My zaraz znachodzimsia na tym etapie, kali nazirajecca pašyreńnie miežaŭ sučasnaha areała pasialeńnia bahamołaŭ i tarantułaŭ. U pryvatnaści, pieršaja rehistracyja bahamoła ŭ Biełarusi była zroblenaja ŭ 1910-ch hadach u rajonie Homiela. Toje, što ciapier hetyja kazurki sustrakajucca pa ŭsioj terytoryi krainy, — vydatna, bo škody asablivaje ad ich niama. Naadvarot, heta pradstaŭniki karysnaje faŭny.
Pieršaja znachodka bahamoła ŭ naš čas u naturalnych bijatopach zafiksavanaja ŭ 2008 hodzie ŭ Biarezinskim bijaśfiernym zapaviedniku. Jaho raspaŭsiudžańnie ciapier — heta indykatar niejkich źmienaŭ».
Bahamoł zvyčajny. Fota: mirchudes.net.
«Na moj pohlad, paniaćcie «paciapleńnie klimatu» ŭ pryncypie patrabuje vielmi surjoznych dyskusij. Lepš vykarystoŭvać termin nie «paciapleńnie», a «źmiena klimatu». A jakija heta źmieny — čarhovaje pytańnie dla čarhovaha abmierkavańnia», — miarkuje sp. Aleh.
