Biełarus padaŭ u sud na Ńju-Jork za toje, što jamu nie pieraškodzili vyskačyć z «chutkaj» na chadu
Žychar Ńju-Jorka Jaŭhien Krałkin, jaki ŭ stanie mocnaha apjanieńnia vyskačyŭ z mašyny chutkaj dapamohi, padaŭ na administracyju horada pazoŭ za toje, što jaho nie ŭtrymali ad skačka, paviedamlaje NYTimes.
Jaŭhien Krałkin
54-hadovy Jaŭhien Krałkin — biełarus, jaki emihravaŭ u ZŠA vosiem hadoŭ tamu — pracuje kiroŭcam-dalnabojščykam. U toj dzień u červieni minułaha hoda jon vypiŭ šmat kańjaku praz «siamiejnyja prablemy» — častku doma, častku paźniej u bary.
Kali jon viarnuŭsia ŭ svoj rajon, chtości vyklikaŭ chutkuju dapamohu. Miedyki, jakija pryjechali na vyklik, pabačyli, što Krałkin siadzić na ziamli ŭ absalutna nieadekvatnym stanie. Mužčyna pavodziŭ siabie nastolki ahresiŭna, što ŭ «chutkuju» jaho pryjšłosia zavodzić z dapamohaj palicyjantaŭ.
Pa šlachu ŭ balnicu Krałkinu ŭdałosia rasšpilić ramiani na nasiłkach, adkryć zadnija dźviery mašyny i vyskačyć ź jaje. Paźniej mužčyna byŭ znojdzieny na darozie biez prytomnaści ź ciažkimi traŭmami — Krałkin atrymaŭ množnyja pierałomy kostak tvaru i krovaźlićcio ŭ mozh.
Ciapier Krałkin padaje ŭ sud na haradskija ŭłady, pažarny departamient i miedykaŭ, jakija pracavali ŭ dzień zdareńnia, patrabujučy kampiensacyi jaho strat. «Jon znachodziŭsia ŭ absalutna biezdapamožnym stanie, u jaho adsutničała zdolnaść prymać rašeńni — a jany nie zmahli pra jaho naležnym čynam pakłapacicca», — śćviardžaje advakat Krałkina.
