Kryk dušy. Jak invalid u Barysaŭskim rajonie chacieŭ kramku adčynić i jak jaho tarmaznuli kabielem
Dobry dzień, pavažanaja redakcyja!
Ja Andrej Michajłavič Mikolinski z ahraharadka Ziembin Barysaŭskaha rajona Minskaj vobłaści. Invalid ź dziacinstva I hrupy (vazočnik), ale ciapier pracuju dyrektaram TAA «Irałta». Na žal, «pracuju» heta nadta mocna skazana — užo amal hod (kali dakładniej — dziesiać miesiacaŭ) pradpryjemstva nie moža pačać pracavać i heta taksama adna z pryčyn bojki (inakš nie nazavieš) z rajvykankamam, ale ab usim paparadku.
10 lipienia 2016 hoda ja z tryma adnaviaskoŭcami zasnavali pradpryjemstva dziela taho, kab pracavać na siabie i atrymlivać krychu bolš hrošaj, čym mahčyma zarabić na vioscy. Zasnavaŭšy svaju spravu, my zaklučyli damovu arendy dla haspadarčaj dziejnaści (handal praduktami) pustujučaha šmat hadoŭ pamiaškańnia ŭ vioscy Karsakavičy Barysaŭskaha rajona. Treba dadać, što niahledziačy na toje, što heta vioska źjaŭlajecca cantralnaj siadzibaj sielskahaspadarčaha pradpryjemstva (zaraz AAT «Karsakavickaje», u pačatku hetaj historyi — KSUP «Karsakavičy-Ahra», ale dalej ja budu ŭžyvać sučasnuju nazvu, kab nie zabłytacca), vioska heta, jak kažuć, «vielmi zabitaja»: amal 50 km ad rajcentra, ubaku ad respublikanskaj šašy, i «kałhas» nie bahaty — chutčej, naadvarot. Ale jość i vialiki plus — znachodzicca jana ŭ najpryhažejšych miaścinach z dobrym palavańniem u vialikich lasach navokał i niedaloka ad Biarezinskaha bijaśfiernaha zapaviednika. Mienavita tam my i źbiralisia pačać pracavać, bo ŭ svaim ahraharadku nie znajšłosia pustoha pamiaškańnia — navat tyja, što začynienyja i nie vykarystoŭvajucca hadami, u arendu na addajuć: napeŭna, hrošy nie patrebnyja.
Prablemy pačalisia adrazu ŭ dzień padpisańnia damovy arendy: u pamiaškańnie, jakoje naležyć AAT «Karsakavickaje», hałoŭny ŭvachod praź nievialički tambur, ź jakoha ŭvachod taksama i ŭ kramu rajonnaha spažyvieckaha tavarystva, jak kažuć, «dźviery ŭ dźviery». I voś heta samaje spažyvieckaje tavarystva, što nazyvajecca, «upiorłasia roham» i nie addało kluč ad ahulnaj terytoryi: «Handlujcie praz kacielniu». Usie razmovy «pa-dobramu» i dovady pra niezakonnaść pieraškodžvańnia dostupu ŭ pamiaškańnie ahulnaha karystańnia natykalisia na sapieńnie i kidańnie telefonnych słuchavak.
Śmiešna i soramna raskazvać, što dublikat kluča byŭ pieradadzieny tolki paśla majho zapisu na pryjom da staršyni rajvykankama, bo skarhi ŭ adździeł handlu i pasłuh skončylisia ničym. Na sam pryjom ja nie trapiŭ — usio vyrašyłasia za try dni.
U arandavanym pamiaškańni pa damovie najmu budaŭniki-pryvatniki zrabili ramont, jasna, što abyšłosia daražej, ale zatoje chutka.
I voś kali da adkryćcia kramy zastałosia tolki padpisać damovu na elektrazabieśpiačańnie pamiaškańnia i vyklikać supracoŭnikaŭ adździeła handlu i pasłuh, vyśvietliłasia, što padklučyć pamiaškańnie da ŁEP prosta niemahčyma.
Kali karaciej, to atrymivajecca tak: sama ŁEP znachodzicca pad adkaznaściu Barysaŭskich elektrasietak, usio elektraabstalavańnie ŭ samim pamiaškańni — pad majoj adkaznaściu, jak dyrektara pradpryjemstva-arandatara, a voś kabiel ad słupa da budynka — pad adkaznaściu AAT «Karsakavickaje» jak ułaśnika pamiaškańnia. Voś i pačałosia majo «błukańnie pa pakutach».
Spačatku vyśvialiłasia, što ŭ haspadarki niama hrošaj na samo dałučeńnie da ŁEP (chto b sumniavaŭsia!) i było zaklučana trochbakovaje pahadnieńnie — apłočvaje ŭsio majo pradpryjemstva, ja navat zakryŭ vočy na toje, što nielha addavać u arendu pamiaškańnie bieź infrastruktury. Na heta i źbirańnie inšych papier (źbiraŭ, zrazumieła, ja) pajšoŭ miesiac, i tut pačynajecca samaje cikavaje: dla dałučeńnia da ŁEP patrebnyja kopija zahadu ab pryznačeńni adkaznaha za elektrahaspadarku i kopija jaho dopusku da pracy ad enierhanadzoru, ale ŭ AAT «Karsakavickaje» jašče z časoŭ cara Harocha adkaznaha za elektrahaspadarku prosta niama, niahledziačy na toje, što biez takoha adkaznaha vykarystoŭvać elektraŭstanoŭki kateharyčna zabaraniajecca, ale što dziaržaŭnamu pradpryjemstvu da niejkich tam zakonaŭ — u našaj ža krainie pierad zakonami ŭsie subjekty haspadarvańnia roŭnyja, ale niekatoryja raŭniejšyja. Aznačała heta tolki adno: albo ŭ AAT «Karsakavickaje» źjavicca ŭ rešcie rešt adkazny za elektrahaspadarku, albo naša TAA «Irałta» treba likvidavać,
bo rehistracyja pradpryjemstva adbyvałasia pa hetym ža adrasie zhodna z harantyjnym listom ad sielhaspradpryjemstva, a pra stračanyja na arendu, na adkryćcio pradpryjemstva, absłuhoŭvańnie raźlikovaha rachunku, na ramont i inšyja drobiazi (u całku amal 20000 rubloŭ — dla siaredniaha zarabotku ŭ ah.Ziembin u 300 rubloŭ heta vielmi šmat i na adkryćcio našaha pradpryjemstva my ŭčatyroch źbirali amal piać hadoŭ) hrošy možna prosta zabycca — dziakuj za padtrymku sielskaj haspadarki. I heta niahledziačy na toje, što takimi dziejańniami AAT «Karsakavickaje» parušaje cełuju kuču zakonaŭ i instrukcyj!
Bolš za čatyry miesiacy (!) amal štodzionnych razmoŭ i svarak z kiraŭnictvam AAT «Karsakavickaje» pryviali da taho, što ŭ apošni tydzień 2016 hoda kiraŭnikom AAT «Karsakavickaje» było pryniataje rašeńnie ŭskłaści abaviazki adkaznaha za elektrahaspadarku na hałoŭnaha inžyniera haspadarki. Radaść maja była niadoŭhaj — u samym pačatku 2017 hoda ŭ rajvykankamie było vyrašana pravieści rearhanizacyju pradpryjemstva.
Zaraz heta vielmi modna — nie pakłapacicca ab tym, kab pradpryjemstva pačało narmalna pracavać, a źmianić nazvu i čakać, pakul hrošy daduć.
U vyniku hetaj praviedzienaj nieviadoma dla jakich metaŭ rearhanizacyi ŭ AAT «Karsakavickaje» źmianiŭsia kiraŭnik, i dla mianie ŭsio pačałosia spačatku. U pieršaj ža razmovie mnie było jasna daviedziena, što asabista ŭ jaho, novaha kiraŭnika, niama sensu štości rabić dla TAA «Irałta» — jamu i tak dobra, a moj abaviazak — płacić arendu, a inšaje jaho nie kłapocić.
Štości dakazvać nie mieła sensu, i ja zapisaŭsia na pryjom da niepasrednaha kiraŭnika hetaha «pamieščyka» (jakim jon siabie ličyć) — da pieršaha namieśnika staršyni Barysaŭskaha rajvykankama načalnika ŭpraŭleńnia sielskaj haspadarki i charčavańnia A.S. Kozieła. Na pryjomie mnie było paabiacana, što da 1 krasavika 2017 hoda prablema budzie vyrašana. «Abiacanka-cacanka, a durniu radaść» — i ŭ durniach, zrazumieła, zastaŭsia ja.
