KDB zatrymaŭ dziesiać kiraŭnikoŭ ź sistemy Ministerstva achovy zdaroŭja i niekalki biznesmienaŭ
Supracoŭniki KDB zatrymali za atrymańnie chabaraŭ dziesiać kiraŭnikoŭ u sistemie Ministerstva achovy zdaroŭja z Homielskaj, Mahiloŭskaj i Hrodzienskaj abłaściej, a taksama Minska. Pra heta paviedamlaje pres-słužba viedamstva.
18 krasavika pry atrymańni chabaru pamieram 2,8 tys. jeŭra byŭ zatrymany hałoŭny doktar ustanovy achovy zdaroŭja «Pinskaja centralnaja balnica» Viktar Asačuk. Paźniej za atrymańnie chabaraŭ zatrymanyja dziesiać kirujučych rabotnikaŭ sistemy achovy zdaroŭja Homielskaj, Mahiloŭskaj i Hrodzienskaj abłaściej, a taksama Minska. Sumy niezakonnych hrašovych uznaharod składali ad 400 da 5 tys. dalaraŭ ZŠA.
«Ustanoŭlena, što słužbovyja asoby na sistemnaj asnovie atrymlivali chabar za stvareńnie ŭmoŭ dla pieramohi ŭ chodzie tendarnaha handlu «patrebnaha pastaŭščyka» abstalavańnia i reahientaŭ ŭ intaresach klinika-dyjahnastyčnych łabaratoryj. Paśla ŭdałaha afarmleńnia ździełki mieniedžary kamiercyjnych struktur pieradavali słužbovym asobam niezakonnaje ŭznaharodžańnie — da 5% pracentaŭ ad koštu realizavanych tavaraŭ. Funkcyjanavańnie nazvanych schiem viało da padaražeńnia abstalavańnia i reahientaŭ na 30—70% dla balnic i paliklinik, a faktyčna — dla biudžetu krainy, ź jakoha apłačvalisia ŭsie zakupki», — raspaviali ŭ viedamstvie.
U dačynieńni da vyšejzhadanych asob raspačaty kryminalnyja spravy pa art. 430 («atrymańnie chabaru») KK Biełarusi, vystaŭleny abvinavačańni i ŭžyta miera strymańnia ŭ vyhladzie ŭtrymańnia pad vartaj.
Akramia supracoŭnikaŭ sistemy achovy zdaroŭja pa art. 431 («dača chabaru») KK Biełarusi zatrymanyja i źmieščanyja pad vartu chabaradavalnikam ź liku funkcyjanieraŭ kamiercyjnych struktur, u tym liku dyrektar NVPUP «Biełrieamied» Mikałaj Ahaniesian.
U KDB taksama paćvierdzili, što 19 krasavika była raspačata kryminalnaja sprava pa č. 4 art. 210 («kradziež šlacham złoŭžyvańnia słužbovymi paŭnamoctvami ŭ asabliva bujnym pamiery») KK Biełarusi ŭ dačynieńni da hałoŭnaha lekara HU «Respublikanskaja kliničnaja balnica miedycynskaj reabilitacyi» Viktara Masła.
«Apošni arhanizavaŭ raskradańnie hrašovych srodkaŭ, jakija naličvalisia padnačalenym jamu rabotnikam administracyi ŭ vyhladzie premijalnych vypłat, na sumu nie mienš za 21 tys. biełaruskich rubloŭ», — rastłumačyli ŭ viedamstvie.
Masła zatrymany, jamu pradjaŭlena abvinavačańnie. Kryminalnaja sprava dla dalejšaha rasśledavańnia pieradadziena ŭ Śledčy kamitet.
Nahadajem, 17 maja TUT.BY paviedamlaŭ pra toje, što pravaachoŭnyja orhany zanialisia pravierkaj faktaŭ zakupki miedtechniki dla paliklinik i balnic Biełarusi pa zavyšanych cenach. Jak udałosia vyśvietlić, u pryvatnaści, havorka viałasia pra zatrymańnie kandydata miedycynskich navuk, dyrektara kampanii «Biełreamied» Mikałaja Ahaniesiana i 5 zahadčykaŭ bujnych łabaratoryjaŭ krainy. Miedykaŭ padazrajuć u atrymańni adkataŭ ad pradprymalnikaŭ za pieramohu ŭ tendarach na zakupku ŭstanovami achovy zdaroŭja abstalavańnia.
