Zatrymany ŭ «spravie patryjotaŭ» Mirasłaŭ Łazoŭski i jaho niaviesta Śviatłana źbirajucca ŭziać šlub
Niaviesta Mirasłava Łazoŭskaha Śviatłana paviedamiła Radyjo Svaboda, što para abmiarkoŭvaje mahčymaść pažanicca.
«Nieviadoma, kali Mirasłaŭ vyjdzie. My vielmi aktyŭna pierapisvajemsia. Ja paśla pracy adrazu idu da paštovaj skrynki, praviaraju, ci niama raptam lista ad jaho. Kali znachodžu, to adrazu siadaju pisać adkaz. Uvieś viečar pišu. Zaraz voś chaču raniej na Hałoŭpaštamt pryjechać, kab paśpieć list ukinuć da 9-j hadziny. Tam kali da 9-j ukinieš, to jon u toj ža dzień da adrasata dojdzie. Albo zaŭtra na ranicu», — havoryć Śviatłana.
Pavodle jaje, spačatku kantaktavać ź Mirasłavam było niaprosta, listy nie dachodzili. Jon navat raspytvaŭ, čamu Śviatłana nia piša.
«Ciapier listy dachodziać užo. Ja starajusia jak maha čaściej pisać. Raźbivaju vialikija listy na niekalki častak i dasyłaju. Kab choć niejkaja była ŭ jaho viestka, niejki łancužok pamiž nami trymaŭsia», — havoryć jana.
Śviatłana taksama padzialiłasia navinoj ab tym, što para abmiarkoŭvaje mahčymaść uziać šlub, pakul Mirasłaŭ Łazoŭski znachodzicca ŭ SIZA. «Viedajecie, hetaja sytuacyja jašče bolš nas źbliziła. My ciapier razmaŭlajem ź Mirasłavam pra šlub. Vierahodna, heta zdarycca, jašče pakul jon budzie ŭ SIZA. My nia viedajem, što budzie dalej, što budzie na sudzie i jakim budzie prysud, jaki moža być termin», — padzialiłasia Śviatłana.
***
Mirasłaŭ Łazoŭski byŭ zatrymany ŭviečary 21 sakavika, praź niekalki hadzin u kvatery, dzie Łazoŭski žyŭ razam sa svajoj niaviestaj, adbyŭsia pieratrus. Pieršapačatkova jamu vystavili abvinavačańnie pavodle č. 3 artykuła 293 (padrychtoŭka masavych biesparadkaŭ). 11 krasavika stała viadoma, što da abvinavačańnia dadaŭsia jašče adzin artykuł — 287 (stvareńnie niezakonnaha ŭzbrojenaha farmavańnia). Usiaho razam z Łazoŭskim u spravie «Biełaha lehijonu» prachodzić bolš za 30 čałaviek. Bolšaja častka ź ich znachodzicca za kratami, u SIZA na vulicy Vaładarskaha i ŭ SIZA KDB.
Rodnyja i blizkija abvinavačanych, a taksama šmatlikija pravaabaroncy i eksperty nazyvajuć spravu sfabrykavanaj.
