Kiraŭnik Microsoft raspavioŭ pra rolu ANB u hłabalnaj kibieratacy
Najbujniejšaja za apošni čas kibierataka virusa-vymahalnika WannaCry źviazanaja z kradziažom dadzienych ab uraźlivaściach, jakija źbirała amierykanskaje ahienctva nacyjanalnaj biaśpieki (ANB), napisaŭ u svaim błohu prezident Microsoft Bred Śmit.
«Raniej my ŭžo bačyli, jak dadzienyja ab uraźlivaściach, jakija źbirała CRU, źjavilisia na «Vikiliks». Zaraz skradzienyja ŭ ANB dadzienyja ab uraźlivaściach udaryli pa karystalnikach pa ŭsim śviecie», — napisaŭ Śmit.
Kali pravieści paralel sa zvyčajnaj zbrojaj, to ekvivalentnym scenarom u dadzienym vypadku staŭ by kradziež rakiet «Tamahaŭk» u amierykanskaj armii, ličyć jon.
«Nieadnarazova ekspłojty (padvid škodnasnych prahram, jakija vykarystoŭvajuć uraźlivaści dla ŭzłomu sietak), što znachodziacca ŭ rukach dziaržaŭnych orhanaŭ, traplali ŭ adkryty dostup i pryčyniali maštabuju škodu», - dadaŭ kiraŭnik kampanii.
Pavodle jaho słoŭ, ułady pavinny nie «składziravać» dadzienyja ab uraźlivaściach, a pieradavać ich raspracoŭnikam, kab jany mahli likvidavać hetyja ŭraźlivaści i pavyšać biaśpieku kampjutarnych sietak.
12 maja prahrama-vymahalnik WannaCry zabłakavała dziasiatki tysiač kampjutaraŭ pa ŭsim śviecie. WannaCry šyfruje fajły karystalnika, paśla čaho ich stanovicca niemahčyma vykarystać. Chakiery prapanoŭvajuć rasšyfravać fajły za peŭnuju sumu ŭ bitkojnach.
Dla napadu była vykarystanaja madyfikavanaja prahrama EternalBlue, jakuju hrupa chakieraŭ The Shadow Brokers skrała ŭ chakieraŭ z Equation Group. U «Vikiliks» pisali, što Equation Group źviazanaja z Ahienctvam nacyjanalnaj biaśpieki ZŠA.
