Кіраўнік Microsoft распавёў пра ролю АНБ у глабальнай кібератацы
Найбуйнейшая за апошні час кібератака віруса-вымагальніка WannaCry звязаная з крадзяжом дадзеных аб уразлівасцях, якія збірала амерыканскае агенцтва нацыянальнай бяспекі (АНБ), напісаў у сваім блогу прэзідэнт Microsoft Брэд Сміт.
«Раней мы ўжо бачылі, як дадзеныя аб уразлівасцях, якія збірала ЦРУ, з'явіліся на «Вікілікс». Зараз скрадзеныя ў АНБ дадзеныя аб уразлівасцях ударылі па карыстальніках па ўсім свеце», — напісаў Сміт.
Калі правесці паралель са звычайнай зброяй, то эквівалентным сцэнаром у дадзеным выпадку стаў бы крадзеж ракет «Тамагаўк» у амерыканскай арміі, лічыць ён.
«Неаднаразова эксплойты (падвід шкоднасных праграм, якія выкарыстоўваюць уразлівасці для ўзлому сетак), што знаходзяцца ў руках дзяржаўных органаў, траплялі ў адкрыты доступ і прычынялі маштабую шкоду», - дадаў кіраўнік кампаніі.
Паводле яго слоў, улады павінны не «складзіраваць» дадзеныя аб уразлівасцях, а перадаваць іх распрацоўнікам, каб яны маглі ліквідаваць гэтыя ўразлівасці і павышаць бяспеку камп'ютарных сетак.
12 мая праграма-вымагальнік WannaCry заблакавала дзясяткі тысяч камп'ютараў па ўсім свеце. WannaCry шыфруе файлы карыстальніка, пасля чаго іх становіцца немагчыма выкарыстаць. Хакеры прапаноўваюць расшыфраваць файлы за пэўную суму ў біткойнах.
Для нападу была выкарыстаная мадыфікаваная праграма EternalBlue, якую група хакераў The Shadow Brokers скрала ў хакераў з Equation Group. У «Вікілікс» пісалі, што Equation Group звязаная з Агенцтвам нацыянальнай бяспекі ЗША.
