Karupcyjanier Žylin źjechaŭ u Rasiju. A ciapier pradaje nadzieł u Drazdach za $350 tysiač
Pavodle zakanadaŭstva, dziaržava maje prava zabrać jaho biaspłatna.
Ihar Žylin — kolišni staršynia kancerna «Biełnaftachim». U kancy 2000-ych rasijskaha top-mieniedžara zaprasili kiravać «Hrodna Azotam», ź ciaham času dali biełaruskaje hramadzianstva.
Ihar Žylin.
Paśpiachovaja karjera skončyłasia ŭ lipieni 2014. Pavodle infarmacyi BiełaPAN, u dačynieńni Žylina była zaviedzienaja kryminalnaja sprava za złoŭžyvańnie ŭładaj. Kali top-mieniedžar «Biełnaftachima» daviedaŭsia pra pieraśled, pasprabavaŭ uciačy ŭ Rasiju. Nie atrymałasia. Praŭda, u izalatary Žylin pravioŭ niašmat času.
«Jamu nichto nie davaŭ prava za košt padnačalenaha sabie pradpryjemstva kvateru ŭtrymlivać, mieć kvateru ŭ Minsku, žonku absłuhoŭvać za košt dziaržavy! Heta niedapuščalna, heta škoda. Ale jon byŭ abličany, pamnožany na try. Zapłaciŭ — da pabačeńnia», — zajaviŭ nieŭzabavie Alaksandr Łukašenka. Jon nazvaŭ Žylina «nie samym strašnym karupcyjanieram» i paraiŭ «nie ciahnuć za kraty».
Sulejman Kierymaŭ, Ihar Žylin i Alaksandr Łukašenka.
Spłata kampiensacyi dziaržavie aznačaje, što top-mieniedžar pryznaŭ svaju vinu ŭ karupcyjnym złačynstvie.
Adrazu paśla vyzvaleńnia Žylin źjechaŭ u Rasiju «na lačeńnie». Naturalna, što viartacca ŭ Biełaruś naftavik nie źbiraŭsia.
Ihar Žylin, jaho brat-bliźniuk i ich siemji.
Adnak u Minsku zastaŭsia jaho aktyŭ. Heta atrymany ŭ padarunak nadzieł u «Drazdach-2» — kvartale dla namienkłatury na ŭskrajku stalicy.
11 sotak elitnaj ziamli dastalisia Žylinu zhodna z rašeńniem Minharvykankama №1210 ad 17 krasavika 2012 hoda. Jon pačaŭ budoŭlu, adnak paśla jaho terminovaha adjezdu z krainy jana zamaroziłasia.
I voś niadaŭna na sajtach ahienctvaŭ nieruchomaści źjaviłasia abjava ab prodažy niedabudavanaha doma ŭ «Drazdach-2».
«Elitnaja katedžnaja zabudova ŭ Minsku, vulica Viaśninka. Učastak 11 sotak / płošča zabudovy 320m2. Budaŭnictva viała padradnaja arhanizacyja pa prajekcie i pad technahladam», — havorycca ŭ abviestcy. Heta i jość katedž Ihara Žylina. Za niedaviedzieny da ładu budynak naftavik-karupcyjanier prosić $350 tysiač.
Pracent budaŭničnaj hatoŭnaści składaje 40%.
Padvał.
Pieršy pavierch.
Druhi pavierch.
Cymus situacyi ŭ tym, što dziaržava maje zakonnaje prava adabrać u Žylina nadzieł. Pavodle ahulnaha praviła, budaŭnictva žyłoha doma pavinna być skončana na praciahu troch hadoŭ. U situacyi Žylina adlik idzie ad 28 krasavika 2012 hoda. Tearetyčna termin budoŭli možna praciahnuć jašče na dva hady, kali vykankam atrymaje papiery pra pavažnyja pryčyny, jakija pieraškadžajuć skančeńniu budaŭnictva.
Prajekt doma Žylina.
«Našaj Nivie» nieviadoma, ci prasiŭ Žylin takuju palohku, ale navat kali b jana była, 28 krasavika 2017 adterminoŭka skončyłasia. Razam z tym, u dakumientach, jakimi my vałodajem, niama paznaki ab kansiervacyi ziamielnaha ŭčastka (u takim razie u naftavika było b jašče try hady).
Tamu Minharvykankam pry žadańni moža biazvypłatna zabrać nadzieł nazad. U takim razie ŭčastak, vyzvaleny karupcyjanieram Žylinym, maje być vydzieleny šmatdzietnaj siamji albo vystaŭleny na aŭkcyjon. Heta byŭ by pieršy vypadak kanfiskacyi ziamli ŭ Drazdach.
Bližejšyja susiedzi — vice-śpikier Savieta respubliki Maryjana Ščotkina i kiraŭnik «Biełavija» Anatol Husaraŭ
