Jak Kačanava za paŭhoda abahnała ŭ čarzie na žyllo 10530 žycharoŭ Centralnaha rajona Minska
Natalla Kačanava ŭ centry. Fota Siarhieja Hudzilina.
«Čarha na palapšeńnie žyllovych umoŭ» u Minsku — dosyć efiemiernaja reč. Ahułam u śpisie bolš za 200 tysiač siemjaŭ, a za minuły hod prava pabudavacca atrymali tolki 626 čałaviek. Praz takija tempy budaŭnictva čarha faktyčna spyniłasia na tych, chto zapisaŭsia ŭ jaje ŭ kancy 1980-ch.
Adnak mnohija ŭsio adno zapisvajucca ŭ lhotny śpis — na ŭsialaki vypadak. Kab zrabić heta, treba pražyć u stalicy 10 hadoŭ. Adnak jość i vyklučeńni — vajskoŭcy, sudździ i inšyja padobnyja katehoryi. Zvyčajna jany budujucca ŭ viedamasnych damach.
Zrešty, isnujuć i vyklučeńni z vyklučeńniaŭ. Internet-partał Minharvykankama dazvalaje adsačyć, jakoje miesca ŭ čarzie zajmaje toj ci inšy hramadzianin.
Našu ŭvahu pryciahnuŭ vypadak Natalli Kačanavaj, ciapierašniaj kiraŭnicy Administracyi prezidenta. Jana razam z mužam pierajechała ŭ Minsk u śniežni 2014 hoda, kali była pryznačanaja vice-premjerkaj. Spačatku žyła ŭ hateli, paśla, musić, na terytoryi rezidencyi Drazdy.
Sajt Minharvykankama paviedamlaje, što hramadzianka Natalla Ivanaŭna Kačanava (data naradžeńnia — 25 vieraśnia 1960) staić na ŭliku ŭ Centralnym rajonie Minska sa składam siamji 2 čałavieki. Jana znachodzicca ŭ ahulnym śpisie z 14 červienia 2016 hoda pad numaram 10532. Aproč taho, Kačanava uklučana ŭ asobny śpis z 14 červienia 2016 hoda, jaje numar u hetym śpisie 3.
Čynoŭnica (na toj momant vice-premjerka pa sacyjalnych pytańniach») upieršyniu źjaviłasia ŭ čarzie na palapšeńnie žyllovych umovaŭ u červieni 2016 hoda. I ŭžo ŭ kastryčniku 2016 hoda Minharvykankam vydzieliŭ joj učastak pad zabudovu ŭ «Drazdach-2»
Na hetym łapiku ziamli pačynajuć budaŭnictva Natalla Kačanava i Stanisłaŭ Zaś, sakratar Rady biaśpieki. Fota Siarhieja Hudzilina.
Takim čynam Kačanava zmahła vyrašyć svajo kvaternaje pytańnie za čatyry miesiacy, abyšoŭšy ŭ čarzie 10530 žycharoŭ Centralnaha rajona Minska.
Čytajcie taksama: Kačanava pačynaje budoŭlu katedža ŭ Drazdach FOTY
Što takoje 10 tysiač čałaviek, jakich abahnała Kačanava?
Heta, naprykład, aŭdytoryja anšłahavaha kancerta Siarhieja Michałka na «Minsk-Arenie».
Albo nasielnictva takoha horada, jak Uzda ci Vałožyn.
Čytajcie taksama. Historyja žyćcia Natalli Kačanavaj: jak valejbalistka z vodakanała stała samaj vysokapastaŭlenaj žančynaj Biełarusi
