Ukrainski desant źbiraŭsia vysadzicca ŭ Krymie, kab sarvać «refierendum»: padrabiaznaści płana
U sakaviku 2014 hoda kijeŭskaje kiraŭnictva raspracoŭvała płan apieracyi pa vysadcy desanta ŭ Krymie, kab sarvać refierendum pa dałučeńni paŭvostrava da Rasii. Pra heta ŭ intervju «Ukrainskaj praŭdzie» raspavioŭ načalnik Hienštaba Uzbrojenych sił Ukrainy Viktar Muženka.
Viktar Muženka.
«1 sakavika my razam z namieśnikam načalnika Hałoŭnaha apieratyŭnaha kiravańnia hienierałam Viktaram Nazaravym prapanavali varyjant reahavańnia na situacyju ŭ Krymie. Mierkavałasia pravieści desantnuju apieracyju: vysadzicca na paŭvostravie i zachapić aeradromy, uzmacnić tam našy hrupoŭki i pravieści peŭnyja dziejańni, jakija b nie dazvolili rasijskim vajennym prasunucca pa adpaviednych napramkach.
Płanavałasia pierachapić vuzki piaresmyk pamiž samym Krymam i Kierčanskim paŭvostravam siłami padraździaleńniaŭ 95-j bryhady. My płanavali taksama zavieści techniku. Praz Arabackuju strełku mieła zajści technika 95-j bryhady i vyjści ŭ rajon Fieadosii. Rasiejcy naroščvali svaje siły ad Sievastopala da Kierčy. Da taho času častka padraździaleńniaŭ našaj 36-j bryhady bierahavoj abarony ŭžo vyjšli pad Simfieropal na Anharski palihon. Tudy my płanavali pierakinuć dva bataljony: tankavy miechanizavany mieŭ pierakryć kirunak pa aŭtastradzie Sievastopal-Simfieropal, a horna-piachotny bataljon mieŭ pierakryć trasu Jałta-Simfieropal jakraz na Anharskim pieravale.
Takim čynam my całkam zabłakavali b dostup rasijskich padraździaleńniaŭ u stepavy Krym. Heta byŭ šaniec, my ličyli. Bo ŭsie vajennyja abjekty na paŭdniovym uźbiarežžy byli ŭžo zabłakavanyja rasijskimi vajskoŭcami».
Pa słovach Muženki, tym ža viečaram samaloty byli adpraŭlenyja na aeradromy dla zahruzki desantu, adnak paśla ekstranaj narady Rady nacyjanalnaj biaśpieki i abarony Ukrainy pastupiŭ zahad admovicca ad hetych płanaŭ.
«Čamu tak adbyłosia? Ja nie viedaju. Mahčyma, na pasiadžeńni Rady było pryniata adpaviednaje rašeńnie. Kali niama palityčnaha rašeńnia, vajskoŭcy takoha rašeńnia nie prymajuć», — razvažaje jon.
Na dumku Muženki, u vypadku realizacyi vyšejapisanaha płana ŭkrainskim vajskoŭcam atrymałasia b całkam zabłakavać dostup da stepavaha Krymu i praviadzieńnie refierendumu akazałasia b vielmi ciažkim, kali nie niemahčymym.
«Jak by dalej raźvivalisia padziei, ciapier vielmi składana pradkazać… Ale byŭ šaniec», — ličyć Muženka.
