ZŠA vysyłajuć fłot da bierahoŭ Paŭnočnaj Karei
Z-za napružanaści na fonie paŭnočnakarejskich rakietnych zapuskaŭ udarnaja hrupoŭka amierykanskaha fłotu na čale z atamnym avijanoscam «Karł Vinsan» atrymała zahad adpravicca ŭ zachodniuju častku Cichaha akijana.
«Pahrozaj numar adzin u rehijonie zastajecca Paŭnočnaja Kareja praź jaje nierazumnuju, biezadkaznuju rakietnuju prahramu, jakaja destabilizuje», — zajaviŭ pres-sakratar kamandavańnia Cichaakijanskaha fłotu ZŠA Devid Bienchem.
Jon nazvaŭ pachod «Karła Vinsana» prajavaj pradbačlivaści i pastajannaj hatoŭnaści.
Prezident ZŠA Donald Tramp raniej zajaviŭ, što nie dazvolić Paŭnočnaj Karei stvarać rakiety, jakija mohuć dasiahnuć terytoryi ZŠA. Jon taksama skazaŭ, što Vašynhton pry nieabchodnaści vyrašyć hetuju prablemu samastojna.
U skład hrupoŭki ŭvachodziać taksama krejsier i dva eśmincy, abstalavanyja kiravanymi rakietami.
Eskadra znachodziłasia ŭ rajonie Sinhapura na šlachu ŭ Aŭstraliju, ale atrymała zahad źmianić kurs.
Avijanoscy kłasa «Nimic», da jakich adnosicca «Karł Vinsan», majuć daŭžyniu amal 330 mietraŭ i vodaźmiaščeńnie za 100 000 ton, jany niasuć na borcie ŭ siarednim pa 80 bajavych samalotaŭ. Pa ŭdarnaj mahutnaści jany pieravyšajuć vajskova-pavietranyja siły mnohich krain.
Paŭnočnaja Kareja, nasupierak rašeńniu AAN, praciahvaje jadziernyja vyprabavańni. Ekśpierty prahnazujuć paŭtareńnie hetych dziejańniaŭ, tamu što kraina płanuje raspracavać jadziernuju bojehałoŭku z dyjapazonam, jakaja dasiahnie terytoryi ZŠA.
U sakaviku Paŭnočnaja Kareja zapuściła ŭ bok Japonskaha mora čatyry balistyčnyja rakiety. Jašče adzin pusk prajšoŭ 5 krasavika napiaredadni vizitu ŭ ZŠA kitajskaha lidara Si Czińpina.
KNR — histaryčny sajuźnik i hałoŭny ekanamičny partnior Pchieńjana.
Paviedamlajecca, što ŭ Piekinie niezadavolenyja praźmiernaj vajaŭničaściu Kim Čen Yna, ale padzieńnia paŭnočnakarejskaha režymu nie žadajuć.
