Davieranaja asoba Niaklajeva raspaviała, jak u 2010 hodzie KDB prapanoŭvaŭ joj pasadu abłasnoha kiraŭnika «Havary praŭdu»
Pad adnym z abmierkavańniaŭ u biełaruskim siehmiencie fejsbuka źjaviŭsia kamientar haradzienca Aleha Kalinkova pra sprobu KDB zavierbavać jaho i pryznačyć na pasadu kiraŭnika abłasnoj filii kampanii «Havary praŭdu». Na prośbu «Našaj Nivy» Kalinkoŭ raskazaŭ padrabiaznaści.
«2010 hod. Ja byŭ davieranaj asobaj Niaklajeva ŭ Hrodnie, byŭ zarehistravany ŭ śpisie CVK. 19 śniežnia, u dzień vybaraŭ, pad abied mianie la padjezda zatrymali milicyjaniery, zavieźli ŭ RAUS. Skłali pratakoł, dali 5 sutak, zdajecca, za ŭdzieł u pikiecie. Kali ja aryšt adbyvaŭ, u noč na 20-ha, pryjechaŭ supracoŭnik KDB, praviali dopyt prosta ŭ izalatary, a ranicaj mianie i majho tavaryša pa kamandzie — Kiryłu Siemienčuka — pavieźli ŭ KDB. Tam sprabavali zavierbavać i była takaja prapanova — uznačalić Hrodzienskuju abłasnuju filiju «Havary praŭdu». Ja spytaŭ pra zarobak, mnie adkazali, što ŭ ich toj, chto dobra pracuje, atrymlivaje 400 dalaraŭ. Abiacali hranty, prajekty roznyja, kazali, što dapamohuć z rehistracyjaj arhanizacyi. I samaje cikavaje, ja kažu, a jak vy mianie prasuniecie? U nas ža nie partyjnaja arhanizacyja, dzie abirajucca, u nas pryznačajucca (tak było ŭ pieršyja časy dziejnaści «HP»). Mnie kedebist skazaŭ: «Tabie pazvoniać i prapanujuć hety post».
Paśla taho, jak ja vyjšaŭ, jon jašče niekalki razoŭ zaprašaŭ mianie na sustrečy, apracoŭvaŭ. Paśla ja skazaŭ, što biez pozvaŭ bolš sustrakacca nie budu. Paśla viarnuŭsia ŭ kraine Dźmitryj Bandarčuk [ciapier — kiraŭnik Hrodzienskaj abłasnoj arhanizacyi «Havary praŭdu»] — jany ž dumali, što jon emihravaŭ — i na hetym usie sustrečy sa mnoj skončylisia», — raskazaŭ Aleh Kalinkoŭ.
«Ankietku taksama prapanavaŭ zapoŭnić. Było 5 arkušaŭ, niekalki błokaŭ. «Jak vy aceńvajecie hramadska-palityčnuju situacyju ŭ krainie?», pra dabrabyt. Dalej — «A što budziecie rabić, kali pry razhonie demanstracyi buduć achviary»? «Ci sutykalisia z vypadkami sabatažu? Jak vy siabie paviadziecie, kali da vas užyvuć fizičny hvałt?». Nu i varyjanty adkazaŭ. Ja zapoŭniŭ nie tak, jak dumaŭ, kaniečnie — pastaviŭ ptušački, i ŭsio», — dadaŭ jon.
Pavodle Aleha, jon adrazu raskazaŭ pra heta svaim paplečnikam, paśla ŭvohule adyšoŭ ad palityki.
U kamientary «Našaj Nivie» Uładzimir Niaklajeŭ skazaŭ, što ličyć situacyju blizkaj da realnaści, bo pra takija vypadki jamu kazali nie raz.
«KDB praspała stvareńnie «HP», tamu paśla jany vielmi nastojliva sprabavali intehravacca. Što z hetaha atrymałasia, my viedajem», — skazaŭ Niaklajeŭ.
My spytalisia i ŭ siońniašniaha kiraŭnika «Havary praŭdu» Andreja Dźmitryjeva, ci mahčyma takoje, što abłasnych kiraŭnikoŭ jaho arhanizacyi pryznačaje KDB?
«Kiraŭnik Dźmitryj Bandarčuk jak byŭ, tak i zastaŭsia. Ja jaho sa svaich dvaccaci hadoŭ viedaju, a nie toje, što jon nieviadoma adniekul tam uziaŭsia. Takija prapanovy KDB mohuć rabicca tolki tym, chto nie razumieje, jak struktura isnuje. Śpiecsłužby mohuć rabić roznyja prapanovy, jakija navat nie zmohuć realizavać. Ja nie ŭjaŭlaju, što heta było b realistyčna, bo kab stać kiraŭnikom — treba mieć davier ludziej. A tak… Mahčyma, heta była takaja sproba kampramietavać ruch — voś, maŭlaŭ, pahladzi, my tudy ludziej pryznačajem, a ty ŭ hetyja idei vieryš», — skazaŭ Dźmitryjeŭ.
