Piśmieńnik Adam Hłobus prysudziŭ premiju «Załataja litara» knizie Horvata
Piśmieńnik Adam Hłobus prysudziŭ svaju subjektyŭnuju premiju «Załataja litara» za 2016 hod knizie Andrusia Horvata «Radziva «Prudok» Dziońnik». Farmuloŭka — «za novaje słova ŭ biełaruskaj litaratury». Pra heta Hłobus paviedamiŭ u svaim fejsbuku.
«Załataja litara» isnuje ad 2004 hoda i ŭručajecca ŭ sakaviku ŭ adnoj ź minskich kaviarań. Pamier premii — sto jeŭra. Łaŭreatami ŭ roznyja hady byli Siarhiej Chareŭski, Uładzimir Arłoŭ, Ihar Babkoŭ, Andrej Fiedarenka.
Intelihient Andruś Horvat (na fota) u 2015 hodzie pierajechaŭ ź Minska ŭ rodnuju viosku ŭ Kalinkavickim rajonie. Jon pačaŭ pisać zachaplalny dziońnik pra svajo žyćcio ŭ vioscy, jak jon abžyvaŭ chałodnuju chatu, kałoŭ drovy i sadžaŭ harod. Zajzdrośniki śmiajalisia: chutka zdasca pacan, vierniecca nazad u stalicu. Nie, Horvat pa-raniejšamu ŭ Prudku, zavioŭ kazu i raduje historyjami pra svaju hadavanku. A jašče Andruś vielmi chutka naźbiraŭ hrošaj na svaju debiutnuju knihu «Radyjo Prudok».