MZS Polščy: Kali Minsk zacikaŭleny ŭ raźvićci dyjałohu, my razam budziem vyrašać, jak budavać jeŭrapiejski šlach
Aktyvizacyja polskaj palityki adnosna Biełarusi adbyłasia ŭ tym liku z-za padziej va Ukrainie. Pra heta zajaviŭ ministr zamiežnych spraŭ Polščy Vitald Vaščykoŭski ŭ intervju vydańniu «Polski dypłamatyčny ahlad».
«My zrabili vysnovy z ukrainskaj situacyi, — skazaŭ jon. — Ukraincy vyjšli na vulicu, kab pratestavać suprać admovy ad prajeŭrapiejskaha kursu prezidenta Viktara Janukoviča. Ale palityka — heta mastactva vybaru pamiž roznymi varyjantami. Adsutnaść vybaru pryvodzić da straty niezaležnaści. My vystupajem za suvierenitet Biełarusi, jak i za suvierenitet i terytaryjalnuju cełasnaść Ukrainy».
Pavodle słoŭ Vaščykoŭskaha, jość sihnały taho, što «biełaruski bok maje nieabchodnaść u pašyreńni prastory dla palityčnaha manieŭru, mahčymaści vybaru i ŭmacavańnia suvierenitetu».
«My dajem takuju mahčymaść, — skazaŭ jon. — My dziejničajem sumiesna sa spadaryniaj Mahieryni [kiraŭnica Słužby zamiežnych dziejańniaŭ ES]. U našych pieramovach ź Biełaruśsiu my dziejničajem ad imia Jeŭropy. Kali biełaruski bok budzie zacikaŭleny ŭ raźvićci takoha dyjałohu, my razam budziem vyrašać, jak pabudavać hety jeŭrapiejski šlach».
«My nie chočam dziejničać suprać kahości, ale chočam pracavać dla dabra ŭsich», — padkreśliŭ kiraŭnik polskaha MZS.
