Lidary krain JEAES padpisali novuju redakcyju Mytnaha kodeksa, Łukašenka nie pryjechaŭ
Lidary čatyroch krain JEAES 26 śniežnia ŭ Sankt-Pieciarburhu padpisali novuju redakcyju Mytnaha kodeksa, paviedamlaje BiełaPAN.
U cyrymonii ŭziali ŭdzieł prezidenty Rasii Uładzimir Pucin, Kyrhyzstana — Ałmaźbiek Atambajeŭ, Kazachstana — Nursułtan Nazarbajeŭ i Armienii — Sierž Sarhsian. Alaksandr Łukašenka ź nieviadomych pakul pryčyn na samit nie pryjechaŭ.
Pres-sakratar Pucina Dźmitryj Piaskoŭ paviedamiŭ žurnalistam, što biełaruski bok prainfarmavaŭ pra niaŭdzieł Łukašenki ŭ mierapryjemstvach. «Ja dumaju, što nam niekarektna było b kazać pra pryčyny, usio ž taki heta pavinna rabić pres-słužba prezidenta Biełarusi», — dadaŭ jon.
Piaskoŭ zajaviŭ, što adsutnaść Łukašenki nie pieraškodzić abmiarkoŭvać pytańni intehracyi. «Tamu što, jašče raz paŭtaraju, usie dakumienty, jakija siońnia buduć padpisvacca, jany raniej byli całkam uzhodnienyja padčas kalehii z našymi biełaruskimi partniorami. I padpisanyja dakumienty dalej prosta buduć nakiravanyja ŭ Minsk z tym, kab Alaksandr Ryhoravič zmoh ich tam padpisać», — skazaŭ pres-sakratar Pucina.
Mytny kodeks Jeŭrazijskaha ekanamičnaha sajuza pryjdzie na źmienu Mytnamu kodeksu Mytnaha sajuza, pryniatamu ŭ 2009 hodzie. Dakumient pavinien zakłaści nieabchodnyja asnovy dla pierachodu da adzinaha mytnaha rehulavańnia ŭ miežach JEAES.
U kodeks, praca nad jakim viałasia na praciahu troch hadoŭ, zakładzienyja novyja padychody da infarmatyzacyi mytnych apieracyj, uvodzicca bolš zručny dla biźniesu ałharytm uzajemadziejańnia ź dziaržaŭnymi orhanami, jaki minimizuje papiarovy dakumientaabarot i fizičny kantakt udzielnikaŭ zamiežnaekanamičnaj dziejnaści sa słužbovymi asobami. Akramia taho, maksimalna ŭnifikujucca mytnyja apieracyi dla ŭsich krain sajuza.
Z uvachodžańniem novaha dakumienta ŭ siłu JEEK budzie vyznačać vierchnija vartasnyja i vahavyja miežy biaspošlinnaha handlu, adzinyja dla ŭsich krain.
Baki ž pavodle svajho mierkavańnia mohuć ustaloŭvać bolš nizkija normy biaspošlinnaha ŭvozu na nacyjanalnym uzroŭni ŭ dačynieńni da tavaraŭ, što pieramiaščajucca z dapamohaj mižnarodnych paštovych adpraŭleńniaŭ, a taksama ekspres-pieravozčykami.
Členy sajuza damovilisia, što praz hod paśla ŭvachodžańnia ŭ siłu novaha Mytnaha kodeksa, u 2018 hodzie, pačniecca pastupovaje źnižeńnie parohu biazmytnaha ŭvozu tavaraŭ z zamiežnych internet-kram u krainy JEAES. Pieršaje źnižeńnie — da 500 jeŭra ŭ 2018 hodzie. Zvyš normy — praduhledžany płaciež u pamiery 30%, ale nie mienš jak 4 jeŭra za 1 kh. Paśla zakančeńnia dvuch hadoŭ z momantu ŭvachodžańnia ŭ siłu kodeksa praduhledžanaje źnižeńnie normy da 200 jeŭra, zvyš hetaha — vypłata 15%, ale nie mienš jak 2 jeŭra za 1 kh.
Miarkujecca, što Mytny kodeks JEAES nabudzie moc 1 lipienia 2017 hoda.
9 śniežnia Alaksandr Łukašenka pravioŭ naradu, na jakoj zapatrabavaŭ zabiaśpiečyć vykanańnie nacyjanalnych intaresaŭ krainy pry pryniaćci Mytnaha kodeksa JEAES. Kiraŭnik dziaržavy zapatrabavaŭ dać prajektu Mytnaha kodeksa «abjektyŭnuju acenku, uzvažyć usie za i suprać, praličyć nastupstvy i mahčymyja ryzyki». «Niahledziačy na stanoŭčyja vodhuki dziaržaŭnych orhanaŭ, navukovych arhanizacyj, u mianie ŭźnikaje šerah pytańniaŭ z punkta hledžańnia zachavańnia ŭ dakumiencie nacyjanalnych intaresaŭ», — zajaviŭ jon.
«My ničoha nie pavinny stracić, u nas hublać niama čaho. Kali asnoŭnyja hulcy našaha ekanamičnaha sajuza — Rasija i Kazachstan — mohuć niedzie na niešta zapluščyć vočy i rukoj machnuć (u ich hrošaj niamierana, viedajecie ad čaho), to ŭ nas takich šalonych hrošaj niama. My zarablajem svaimi mazhami i rukami hetyja hrošy», — padkreśliŭ Łukašenka.
Łukašenka taksama adznačyŭ, što ekanomika Biełarusi amal dva hady funkcyjanuje ŭ miežach JEAES. «Vyniki viadomyja. Ja ŭžo nie adzin raz pra heta kazaŭ. Padzieńnie tavaraabarotu ŭ sajuzie — prykładna 40% letaś, sioleta — pryblizna 15%. Voś vynik», — skazaŭ Łukašenka
Varta adznačyć, što Mytny kodeks Mytnaha sajuza, jaki ŭvajšoŭ u siłu 1 lipienia 2010 hoda, biełaruski kiraŭnik padpisaŭ ź piacidzionnym spaźnieńniem. U abumoŭleny termin dakumient nabyŭ moc tolki na terytoryi Rasii i Kazachstana.
