Śviatłana Kul. Biełaruski kałaŭrot
Na nočy i na dni achajna dzielić
Piarestuju kaśmičnuju kudzielu,
Pradzie svajo žyćcio za hodam hod
Pavolny biełaruski kałaŭrot,
Rypić šatun u śpioku, doždž i ściužu,
Kab z zornaha pačyśsia spraści kužal.
Na nitku pahladzić z žurboj i skruchaj
Historyja — sivaja papraducha:
Z ačoskaŭ vybiahajuć z-pad ruki
Šurpatyja, jak kamień, vuziałki,
Na koła navivajecca pavoli
Strakataja, pakručanaja dola.
Staraja i amal užo ślapaja
Čyrvony koler ź biełym zavivaje
Ad tysiačahadovaj daŭniny:
Niadoŭhi mir — stahodździami vajny,
Usio ŭ adnoj dla nas splataje nitcy —
Časany lon i šeruju kastrycu,
Haładamor i paru viosnaŭ sytych,
Vałoški ščodra zavivaje ŭ žyta,
Suvoraj nitkaj u jaje rukach
Spahada pierakrucicca i žach.
My budziem žyć — u kniastvie, ci ŭ kałhasie,
Kab tolki nitka nie abarvałasia…
17.12.16