Hubarevič patrabuje raspačać kryminalnyja spravy pa faktach falsifikacyj na vybarach
Były kandydat u deputaty pa 108 Kalinoŭskaj vybarčaj akruzie Juraś Hubarevič nakiravaŭ skarhu ŭ Śledčy kamitet pa vynikach vybaraŭ z patrabavańniem pravieści pravierku i pakarać vinavatych u falsifikacyjach.
«Padčas jak daterminovaha, tak i asnoŭnaha hałasavańnia mnoj, a taksama inšymi hramadzianami byli zafiksavanyja šmatlikija fakty parušeńniaŭ Vybarčaha kodeksu Respubliki Biełaruś. Liču, što hetyja fakty dakładna śviedčać ab tym, što padčas vybaraŭ, padliku hałasoŭ pa Kalinoŭskaj vybarčaj akruzie № 108 byli dapuščany takija parušeńni Vybarčaha kodeksu, jakija paŭpłyvali na vyniki vybaraŭ», — skazana ŭ skarzie Hubareviča.
Jon ličyć, što padčas hałasavańnia pa Kalinoŭskaj vybarčaj akruzie № 108, u pryvatnaści, vioŭsia niapravilny padlik vybarščykaŭ, jakija ŭziali ŭdzieł u hałasavańni. Pa padlikach naziralnikaŭ, razychodžańnie ŭ kolkaści vybarščykaŭ z aficyjnymi dadzienymi było zafiksavanaje na bolšaści ŭčastkaŭ Kalinoŭskaj akruhi. Takim čynam, razychodžańnie ŭ jaŭcy skłała 5546 hałasoŭ.
«Uličvajučy, što naziralniki znachodzilisia na ŭsich učastkach bieśpierapynna na praciahu ŭsiaho času dla hałasavańnia i viali ŭlik prahałasavaŭšych vybarščykaŭ, ličby naziralnikaŭ musiać być dakładnymi. Kali b i było razychodžańnie pa ličbach, jano musiła być minimalnym», — ličyć Juraś Hubarevič i dadaje, što «razychodžańnie pa ličbach vyśvietliłasia tolki ŭ apošni dzień daterminovaha hałasavańnia — u astatnija dni ličby naziralnikaŭ supadali ź ličbami ŭčastkovych kamisij».
Heta śviedčyć, pa mierkavańni byłoha kandydata ŭ deputaty, pra toje, što ŭ apošni dzień daterminovaha hałasavańnia (10 vieraśnia), a taksama ŭ dzień asnoŭnaha hałasavańnia (11 vieraśnia) u skryni dla hałasavańnia byli dadanyja dadatkovyja biuleteni.
Jon patrabuje pravieści pa dadzienym fakcie pravierku: apytać naziralnikaŭ, pravieryć śpis vybarščykaŭ i ich podpisy, abzvanić usich vybarščykaŭ, pravieści hrafałahičnuju ekśpiertyzu podpisaŭ u žurnale ŭliku vybarščykaŭ.
Akramia taho, Hubarevič adznačyŭ u skarzie vypadki ŭkidvańnia biuleteniaŭ: na ŭčastku № 625 (naziralnik Jakaŭ Navumienka zaŭvažyŭ vialiki stos biuleteniaŭ u skryni dla daterminovaha hałasavańnia), 609 (naziralniki zaŭvažyli ŭskryćcio skryni, piačatka i nitka nie supadali).
Pa mierkavańni pieršaha namieśnika staršyni Ruchu «Za Svabodu», na akruzie vioŭsia taksama niapravilny padlik hałasoŭ. Tak, na ŭčastku № 618 staršynia kamisii paśla padliku hałasoŭ ahučyŭ vyniki hałasavańnia, jakija nie supadali z dadzienymi z vynikovaha pratakołu, pry vyvučeńni tablicy z vynikami hałasavańnia ŭ akruhovaj kamisii vyśvietliłasia, što dadzienyja ŭ akruhovaj kamisii nie adpaviadajuć dadzienych pa hałasavańniu na niekatorych učastkach (pa ŭčastkach № 604, 609, 610, 616, 619, 624, 631, 637).
Na padstavie pryviedzienych faktaŭ Juraś Hubarevič patrabuje pravieści «pravierku pa parušeńniach vybarčaha zakanadaŭstva pry praviadzieńni hałasavańnia pa Kalinoŭskaj vybarčaj akruzie № 108, ŭ tym liku pravieści hrafałahičnuju ekśpiertyzu podpisaŭ u žurnale ŭliku vybarščykaŭ i apytać samich vybarščykaŭ, a taksama naziralnikaŭ», «raspačać kryminalnuju spravu ŭ adpaviednaści z art. 192 Kryminalnaha kodieksu Respubliki Biełaruś».
