Na fest u Minsk pryjazdžaje pahanski, antychryścijanski hurt z Ukrainy — vierniki vystupajuć suprać
25—26 červienia ŭ zaharadnym kompleksie Kamarova, što niedaloka ad Minsku, projdzie fest «Kupalskaje koła». Heta štohadovaja muzyčnaja schodka amataraŭ ciažkoj muzyki. Ładzić fiestyval viadomy muzyka, lidar hurtu Znich Aleś Tabolič.
Zdajecca, niamnohija, aproč amataraŭ takich śpievaŭ, źviarnuli ŭvahu na «Kupalskaje koła», kali b uvahu nie praciahnuli tym, što na fest zaprošany dastatkova nieadnaznačny hurt z Ukrainy Nokturnal Mortum.
Raniej hetyja chłopcy pazicyjanavali siabie jak «nacyjanał-sacyjalistyčny błek-mietał». Heta nakirunak, jaki aryjentavany na nacysckuju tematyku i adpaviednuju atrybutyku.
Pieršym na heta źviarnuŭ uvahu pratestancki viernik, hramadski aktyvist Andrej Kim.
«Za łživosť riečiej, za postrojku cierkviej židovskoje plemia dołžno byť raśpiato!»
«Heta vytrymka ź pieśni «V ohnie dierieviannych cierkviej» charkaŭskaha hurtu Nokturnal Mortum. Hurt paśladoŭna rekłamuje rasizm, nacyzm, satanizm, antysiemizm i antychryścijanstva. Nie tolki ŭ tekstach piesień, ale i ŭ intervju ich lidar rehularna vykazvaje čałaviekanienaviśnickija idei», — napisaŭ Andrej Kim na svajoj staroncy ŭ fejsbuku.
Jašče Kim pryvodzić cytatu lidara NM ab chryścijanstvie: «Chryścijanstva — heta duchoŭnaja i fizičnaja śmierć, kaniec raźvićcia i ruchu napierad. My ni ŭ jakaj miery nie adraklisia ad śviatoj vajny suprać inšarodnaha chryścijanstva, a stali jašče bolš žorstkim i macniejšymi», — kaža Jaŭhien Hapon.
Suprać pryjezda Nokturnal Mortum vystupili taksama sustaršynia arhkamiteta BCHD Pavieł Sieviaryniec i maładafrontaviec Źmicier Daškievič.
«Arhanizataram, siarod jakich moj daŭni znajomy Aleś Tabolič, varta ŭsio-taki pryznać pamyłku i pa-dobramu parazmaŭlać z hetymi charkaŭskimi muzykami. Prosta patelefanavać i skazać: nu siabry, vy ž razumiejecie, tut ludzi aburajucca, budzie skandał, ad jakoha vyjhrajuć tolki Maskva i Łukašenka.
Pastavić umovu, kab publična admiežavalisia ad svajho raniejšaha piekła. Zaraz. Aficyjnuju zajavu Hapona. Kali nie — aŭfiderzejn. Pierabić rekłamu i ciešycca kupalskimi matyvami hurtoŭ, nie zapeckanych u nastolki śmiardziučym brudzie. Tryvać takoje — heta źniavaha», — ličyć Pavieł Sieviaryniec.
Prychilniki Nokturnal Mortum u svaju čarhu pierakonvajuć, što lidar hurta daŭno źmianiŭ svaje pohlady. U jakaści prykładu pryvodziać jahonyja słovy z sacyjalnaj sietki Ukantakcie. Dziela spraviadlivaści, varta adznačyć, što jany dastatkova raspłyvistyja.
«Mnohija svaje pohlady, jakija byli ŭ mianie ŭ minułym, ja nie padzialaju siońnia ŭ siłu šerahu pryčyn: štości akazałasia šałupinaj, u čymści rasčaravaŭsia, niešta — nie važna! Tamu, naprykład, kali pytajucca mianie siońnia pra maje palityčnyja pohlady, ja adkazvaju, što ja pa-za hetym, i heta tak i jość», — napisaŭ u kastryčniku 2014 hoda lidar Nokturnal Mortum Jaŭhien Hapon.
My taksama paprasili prakamientavać situacyju arhanizataraŭ «Kupalskaha koła». «Tvorčaść hurtu Nokturnal Mortum na siońniašni dzień, jak i ideałahičnaja pazicyja kalektyva, nie nosiać nieanacyscki charaktar. U tvorčaści hurtu na pačatkovych etapach nasamreč sustrakalisia niekatoryja radykalnyja aśpiekty.
Niekalki hod tamu NM adkryta zajavili ab svaim poŭnym niedačynieńni da radykalnaj płyni. Vystup hurtu i set-list z zajaŭlenymi tekstami prajšoŭ uzhadnieńnie ŭ harvykankamie i kamitecie pa ideałohii. Na fiestyvali prahučać kampazicyi, źmiest jakich nie vyklikaje chvalavańniaŭ», — zaznačyła ŭ kamientary arhanizatarka Naścia Dubovik.
Mnohija adznačajuć, što z pačatkam vajny va Ukrainie Nokturnal Mortum istotna źmianiŭ svoj repiertuar, jaki staŭ bolš patryjatyčnym i praŭkrainskim. A kavier na śpieŭ NK «Ukrajina» rabiŭ navat Aleh Skrypka z «Voplaj Vidaplasava».
Arhanizatary nie źbirajucca admaŭlacca ad vystupu Nokturnal Mortum na «Kupalskim kole».
