Staršyniu Biełteleradyjokampanii kantuziła na infarmacyjnaj vajnie?
Chto kaho zaprašaŭ na «Kłub redaktaraŭ» i chto što adkazvaŭ.
U čarhovym efiry «Kłuba redaktaraŭ» Hienadź Davydźka zajaviŭ, što suprać dziaržavy viadziecca… infarmacyjnaja vajna: «Niadaŭna ažyćciaŭlałasia ataka na milicyju, paśla — na členaŭ urada, a ciapier — na žurnalistaŭ, pierajšli na asoby. Heta nie krytyka, a mienavita ataka».
Nahodaj dla takich napadak na «Našu Nivu» stała publikacyja na našym sajcie taho fakta, što na staroncy ŭ sacsietcy televiadučaha BT Siarhieja Husačenki stali źjaŭlacca nadpisy «Jość takaja prafiesija — iłhać štoviečar». Za niekalki dzion da taho toj pradstaŭlaŭ u efiry siužet, dzie asudžanych pa «spravie hraficistaŭ» vystavili narkamanami, što pracujuć za valutu.
Abureńnie Davydźki nie padzialiŭ kiraŭnik «Sovietskaj Biełoruśsii» Pavieł Jakubovič. Jon zajaviŭ, što nie varta zatykać rty i ličyć častku presy sumlennaj, a častku — niesumlennaj. A paśla zaklikaŭ redaktaraŭ niedziaržaŭnych ŚMI da ŭdziełu ŭ «Kłubie redaktaraŭ». Na što Davydźka zajaviŭ, što «zaprašali, jany admaŭlajucca».
Što ž, raz tak, pryjšła «Našaj Nivie» para padniać archivy svajoj pierapiski sa sp.Davydźkam.
Tut treba zrabić ekskurs u historyju.
Davydźka ŭznačaliŭ Biełteleradyjokampaniju pry kancy 2010 hoda. Nieŭzabavie jon zapuściŭ «Kłub redaktaraŭ» — štotydniovuju teleprahramu.
U joj hałoŭnyja redaktary biełaruskich ŚMI abmiarkoŭvajuć padziei ŭ krainie i śviecie.
«Nas časta paprakali, što ŭ nas tolki adno mierkavańnie. Kali łaska, prychodźcie ŭsie, havarycie. Lubyja zajaŭki ad luboha vydańnia, luboha razumnaha čałavieka buduć zadavoleny, i jon budzie zaprošany ŭ «Kłub redaktaraŭ». Tym bolš kali my vyjdziem u žyvy efir. My ničoha nie baimsia, nie baimsia čužoha mierkavańnia», — zajaviŭ Davydźka ŭ intervju «Kamsamolskaj praŭdzie» ŭ sakaviku 2011 hoda. (My, darečy, pra ŭsio heta paviedamlali.)
Imhnienna, praź niekalki dzion, «NN» dasłała svaju «zajaŭku». «Kali prahrama budzie iści ŭ žyvym efiry, heta moža stać asabliva značnym unioskam u zdabyćcio svabody słova biełaruskim hramadstvam. Čytačy vykazali pažadańnie, kab i redaktary «Našaj Nivy» vystupili ŭ «Kłubie redaktaraŭ». Budziem udziačnyja za zaprašeńnie», — napisali my Davydźku.
Piać hadoŭ minuła, a reakcyi na hetuju prapanovu dahetul niama.
Takim čynam, nasupierak słovam Hienadzia Branisłavaviča, nie tolki jon nie zaprašaŭ u efir redaktaraŭ «NN», a redaktary prapanoŭvali jamu heta i adkazu nie dačakalisia.
Jak nie dačakalisia žyvoha efiru i hledačy. Prahramy čyściacca, kab ničoha «lišniaha» nie trapiła ŭ efir. Ale vierniemsia da historyi našaj pierapiski, jakaja mieła praciah.
Padčas pres-kanfierencyi Alaksandra Łukašenki ŭ studzieni 2015 hoda «Naša Niva» zadała pytańnie pra stvareńnie biełaruskamoŭnaha dziciačaha telekanała — hetaj umovy vyžyvańnia rodnaj movy, kab jaje mahli zasvojvać dzieci. Kiraŭnik krainy tady pastaviŭ niekalki ŭmovaŭ i padsumavaŭ: «Kali vy zdolnyja stvaryć kanał — rabicie. Tolki kab ludzi hladzieli vas».
Nieŭzabavie paśla taho «Naša Niva» źviarnułasia da Davydźki z čarhovaj prapanovaj.
Pamočnik Davydźki, V.Tkač, adkazaŭ łakanična.
Mienavita tak: «aTsutničaje», «BiełteleradEjokampanija» (apošniaje — nie vypadkova, dvojčy tak napisana).
My nie pavieryli svaim vačam. Čatyry pamyłki ŭ dvuch skazach. U kiraŭnictvie Biełteleradyjokampanii nie ŭmiejuć biez pamyłak napisać słova «radyjo». Nu i profi! Nu i majstry słova! Z šapki błanka śpisać nie ŭmiejuć, a na telebačańnie praleźli.
Paśmiajalisia my i pakłali toj adkaz u archiŭ. Nie chaciełasia dyskredytavać dziaržaŭnyja struktury publikacyjaj.
…My nie viedajem pryčyny «časovaj niepracazdolnaści» zasłužanaha artysta Biełarusi, jaki, zadraŭšy štany, papior na ideałahičnuju pieradavuju. I ŭ «Kłubie redaktaraŭ» ni Andreja Dyńko, ni Śviatłany Kalinkinaj, ni Iosifa Siaredziča tak i nie pabačyli.
Pry hetym Davydźka praciahvaje paŭtarać u efiry «Biełaruś-1», što zaprašaje niedziaržaŭnyja ŚMI da dyjałohu. I jon ža zrabiŭ usio, kab pasvarycca z hetymi ŚMI. Biez daj pryčyny jon ablivaŭ brudam pa čarzie takija papularnyja vydańni, jak «Narodnaja Vola», «Tut.baj», «Naša Niva»…
Stolki karysnaha, stolki kanstruktyŭnaha zrabili niedziaržaŭnyja ŚMI za apošnija hady dla pavyšeńnia ekanamičnaj hramatnaści, hramadzianskaj śviadomaści, raźvićcia nacyjanalnaj kultury. I tak, my vostryja. Takoj, tolki takoj i pavinna być žurnalistyka.
A Hienadź Davydźka, mahčyma, nie «časova niepracazdolny», a taki ž prafnieprydatny, jak i jaho pamočnik. Ci ž pravilna, kab čałaviek, jaki absalutna nie viedaje cany słovam, vioŭ prahramu, zajmaŭ pasadu staršyni Dziaržteleradyjokampanii?
* * *
Čym zajmajucca byłyja staršyni Biełteleradyjokampanii?
Alaksandr Zimoŭski (2005—2010) — vyjechaŭ na rabotu ŭ Sankt-Pieciarburh.
Uładzimir Maćviajčuk (2004—2005) — pracuje ŭ sakrataryjacie staršyni Vyšejšaj dziaržaŭnaj rady sajuznaj dziaržavy.
Jahor Rybakoŭ (2001—2004) — byŭ prysudžany da 11 hadoŭ pazbaŭleńnia voli ŭ kałonii strohaha režymu za karupcyju.
Valeryj Skvarcoŭ (2001) — pamior praz 2,5 miesiaca paśla pryznačeńnia.
Viktar Čykin (2000—2001) — pajšoŭ na panižeńnie ŭ hazietu «7 dniej».
Ryhor Kisiel (1994—2000) — ciapier staršynia praŭleńnia ANT.
* * *
Čytajcie jašče: Redaktary niedziaržaŭnych ŚMI źviarnulisia ŭ Biełteleradyjokampaniju
