Kampanija «Prava vybaru»: Prezidenckija vybary nie svabodnyja, nie spraviadlivyja i nie sumlennyja
Kampanija «Prava vybaru» padviała vyniki nazirańnia za praviadzieńniem prezydenckich vybaraŭ Respubliki Biełaruś i ahučyła ich na presavaj kanferencyi.
Praviali jaje čalcy kampanii — pradstaŭniki vaśmi palityčnych partyjaŭ i arhanizacyjaŭ. Heta Biełaruskaja sacyjał-demakratyčnaja partyja (Hramada), Biełaruskaja chryścijanskaja demakratyja, «Havary praŭdu», ruch «Za svabodu», partyja BNF, Biełaruskaja partyja «Zialonyja», prafsajuz Radyjoelektronnaj pramysłovaści, arhkamitet Partyi Svabody i prahresu.
Nazirańnie adbyvałasia na 450 vybarčych učastkach u roznych haradach krainy. U vyniku nazirańnia za daterminovym hałasavańniem i hałasavańniem u asnoŭny dzień vybaraŭ jany zafiksavali šerah parušeńniaŭ z boku ŭčastkovych vybarčych kamisijaŭ.
Tak, kolkaść vybarcaŭ, jakija pryjšli na ŭčastki padčas daterminovaha hałasavańnia, pavodle padliku vybarčych kamisijaŭ, skłała 31,1% hramadzian, pavodle naziralnikaŭ — 29,8%. Kolkaść hramadzian, jakija prahałasavali ŭ asnoŭny dzień, pavodle vybarčych kamisijaŭ, pieravysiła kolkaść padličanych naziralnikami na 32 tysiačy 301 čałaviek, albo na 9,6%.
Naziralniki taksama adznačyli manipulacyi sa śpisami vybarcaŭ i hałasavańniem pa miescy žycharstva. Taksama ŭčastkovyja vybarčyja kamisii čynili pieraškody pracy samim naziralnikam: pazbaŭlali akredytacyi, mahčymaści nazirać za padlikam hałasoŭ, zabaraniali fatahrafavać, admaŭlalisia davać źviestki pra śpisy vybarcaŭ i vyniki hałasavańnia.
Padsumoŭvajučy, kampanija «Prava vybaru» zajaviła, što prezydenckija vybary nielha nazvać prazrystymi, svabodnymi i demakratyčnymi i što jana nie pryznaje ich vyniki. Adzin z pradstaŭnikoŭ kampanii, sustaršynia partyi BCHD Vital Rymašeŭski, u pryvatnaści, adznačyŭ:
«Cyničnaja pastanoŭka spektaklu, jaki ŭłady nam padajuć jak svabodnyja i sumlennyja vybary, źjaŭlajecca hrubym parušeńniem pravoŭ usich hramadzian Biełarusi na spraviadlivyja i svabodnyja vybary, na abrańnie ŭłady».
Jak paviedamili pradstaŭniki kampanii «Prava vybaru», pratakoł pra vyniki nazirańnia jany pieradaduć u vybarčy štab Taciany Karatkievič, kab taja padała skarhu ŭ Viarchoŭny sud Respubliki Biełaruś.
