Imparciory šrotu ŭ Rasiju majuć pretenzii da Biełarusi
Imparciory šrotu ŭ Rasiju, što viazuć pradukt praź Biełaruś, paskardzilisia ŭ Raśsielhasnahlad, što biełarusy prymušajuć płatna zdrabnić jaho na svaich pradpryjemstvach.
Hałoŭnaja dziaržaŭnaja inśpiekcyja pa nasieńniavodstvie, karancinie i achovie raślin Biełarusi abaviazvaje imparcioraŭ šrotu ŭ RF dadatkova płatna zdrabnić jaho na pradpryjemstvach respubliki na padstavie źniščeńnia škodnasnaha nasieńnia pustaziella. Pra heta havorycca ŭ paviedamleńni Fiederalnaj słužby pa vieterynarnym i fitasanitarnym nahladzie RF (Raśsielhasnahlad), piša TASS.
Šrot — heta pabočny pradukt vytvorčaści aleju, naprykład, sojevaha, jaki vykarystoŭvajecca ŭ karmleńni žyvioły.
«Hałoŭnaj dziaržaŭnaj inśpiekcyjaj pa nasieńniavodstvie, karancinie i achovie raślin Biełarusi pry vyjaŭleńni ŭ šrocie, pryznačanym dla Rasii, što pieramiaščajecca pa terytoryi Mytnaha sajuza, nasieńnia pustaziella prapanujecca taki šrot pieramałoć da čaścic, jakija nie pieravyšajuć 1 mm pa najbolšym vymiareńni, na biełaruskich pradpryjemstvach», — havorycca ŭ paviedamleńni.
Raśsielhasnahladu pra dziejańni Dziaržinśpiekcyi Biełarusi paviedamiŭ «šerah rasijskich haspadarčych subjektaŭ» Rasii, adznačajecca ŭ dakumiencie.
«Hetaja miera nie maje nijakaha bijałahičnaha abhruntavańnia i matyvavanaja tolki ekanamičnymi mierkavańniami», — rastłumačyła TASS krynica ŭ Raśsielhasnahladzie. Pavodle jaje słoŭ, pry vytvorčaści šrotu syravina nahravajecca da vielmi vysokich tempieratur, što robić nasieńnie ŭsich raślin, u tym liku pustazielnych, niežyćciazdolnym, i dalejšaja apracoŭka nie treba. Krynica dadała, što Dziaržinśpiekcyja Biełarusi «chutčej abaviazvaje, a nie prapanuje» zdrabnić šrot.
«Dla ŭrehulavańnia situacyi, źviazanaj ź pieramiaščeńniem pa terytoryi Mytnaha sajuza šrotu, Raśsielhasnahlad źviarnuŭsia ŭ Jeŭrazijskuju ekanamičnuju kamisiju i Ministerstva sielskaj haspadarki i charčavańnia Biełarusi z prapanovaj praviadzieńnia nieadkładnych kansultacyj», — reziumujecca ŭ paviedamleńni.
