Raiffeisen prahnazuje nulavy rost VUP Biełarusi ŭ 2015 hodzie
Analityki aŭstryjskaj bankaŭskaj hrupy Raiffeisen, jakoj naležyć adzin z najbujniejšych u Biełarusi bankaŭ, čakajuć u 2015 hodzie nulavy rost biełaruskaj ekanomiki.
Pavodle acenak daśledčaha padraździaleńnia bankaŭskaj hrupy Raiffeisen Research, rost VUP Biełarusi sioleta składzie 0%, a inflacyja — 18%.
Rost naminalnaj zarabotnaj płaty prahnazujecca na ŭzroŭni 15%, deficyt rachunku biahučych apieracyj składzie 5,9% VUP. Mižnarodnyja reziervovyja aktyvy, jak čakajecca, nie źmieniacca ŭ paraŭnańni z pačatkam hetaha hoda i pavodle vynikaŭ 2015-ha składuć 5,1 młrd. dołaraŭ.
Nahadajem, u 2014 hodzie rost VUP Biełarusi byŭ ŭdvaja nižejšy za prahnazavany (zamiest aficyjna prahnazavanych 3,3% ekanamičny rost skłaŭ 1,6%).
Nizkija tempy ekanamičnaha rostu ŭ Biełarusi ŭ 2014 hodzie ekśpierty tłumačać situacyjaj u Rasii, VUP jakoj u vyniku dziejańnia zachodnich sankcyj i padzieńnia suśvietnych cen na naftu staŭ źnižacca.
Pavodle studzieńskaha prahnozu Jeŭrapiejskaha banka rekanstrukcyi i raźvićcia (JEBRR), VUP Rasii ŭ 2015 hodzie moža źnizicca na 5%. Na hetym fonie JEBRR pahoršyŭ prahnoz rostu biełaruskaj ekanomiki: zamiest raniej prahnazavanaha rostu VUP na 0,5% zaraz analityki banka čakajuć padzieńnie na 1,5%.
Miž inšym biełaruskija ŭłady zaćvierdzili na 2015 hod prahnoz pa roście VUP na ŭzroŭni 0,2—0,7%.
Ekśpierty biełaruskaha Daśledčaha centra IPM u svaim makraekanamičnym prahnozie adznačajuć, što «dalejšaje paharšeńnie navakolnaha asiarodździa, novyja šoki na ŭnutranym rynku i adsutnaść dostupu da finansavańnia» mohuć pastavić pad sumnieńnie mahčymaść dasiahnieńnia navat ścipłych tempaŭ ekanamičnaha rostu ŭ 2015 hodzie.
Varta adznačyć, što raniej biełaruskija ŭłady płanavali na najaŭnuju piacihodku (2011—2015 hady) rost VUP na ŭzroŭni 62—68%. Dla vykanańnia hetaha pakazčyka tempy ekanamičnaha rostu ŭ Biełarusi pavinny składać nie mienš jak 10% u hod.
Faktyčnyja tempy ekanamičnaha rostu ŭ hetaj piacihodcy byli takimi: 2011 hod — 5,5%, 2012-ty — 1,7%, 2013-ty — 0,9%, 2014-ty — 1,6%.
