Pucin — heta Hitler siońnia
Takoje «adkryćcio» naležyć nie mnie. Hetaje paraŭnańnie stała štampam, ahučvajecca navukoŭcami i palitykami, błukaje ŭ siecivie.
Hitler «padniaŭ z kaleniaŭ» Hiermaniju paśla jaje vajennaj parazy i viersalskaha panižeńnia. Rasijskaja psichika, jak vyjaviłasia, taksama była traŭmavanaja tym, što čatyrnaccać byłych savieckich krain stali zamiežžam. Adčuvalnaj była i paraza ŭ pieršaj vajnie ŭ Ičkieryi. I voś Pucin, jak ličycca, «padniaŭ z kaleniaŭ» svaju prynižanuju radzimu.
Jość anałohija i pamiž tym, jak hitleraŭskaja Hiermanija padahravała «patryjatyčnyja» nastroi niemcaŭ u Sudeckaj vobłaści Čechasłavakii, i tym, što pucinskaja Rasija vytvaraje ŭ Krymie.
Dałučeńnie Sudetaŭ, jak i anšlus Aŭstryi, stali piaredadniem Druhoj suśvietnaj vajny (zrešty, Stalin i jaho partyja ŭžo ŭ sakaviku 1939-ha ličyli, što vajna pačałasia). Ci dojdzie ciapier da Treciaj suśvietnaj vajny? Hetaje pytańnie zadajuć mnohija.
Što ŭ padpalščyka suśvietnaj vajny, «śviatoha» Mikałaja II, byli abmiežavanyja razumovyja zdolnaści, – toje nie sakret. Što ŭ padpalščykaŭ nastupnaj vajny, Hitlera i Stalina, nie ŭsio ŭ paradku było ź psichikaj, – pra toje chto tolki nie pisaŭ. Ciapier palityki, publicysty i analityki ŭhołas razvažajuć pra šyzafreniju Pucina. Kali zhadać, što na Rasii lažyć vina za Pieršuju suśvietnuju vajnu, što Rasija pad imiem SSSR razam z Hiermanijaj raźviazała Druhuju suśvietnuju vajnu, kali ŭličyć tuju šavinistyčnuju isteryju, jakaja siońnia panuje ŭ Rasii i ŭ Dziaržaŭnaj dumie, čamu nie dapuścić, što adnaho razu rasijskaje kiraŭnictva moža nacisnuć na knopku?
Kaniec anałohij
U 1938 hodzie Hitler damohsia ad Francyi i Złučanaha Karaleŭstva aficyjnaj zhody na dałučeńnie Sudetaŭ da Hiermanii. U 2014 hodzie Pucin nie atrymaŭ i nie atrymaje aficyjnaj zhody zachodnich demakratyj na dałučeńnie Kryma da Rasii.
Dzialić Čechasłavakiju Hiermanii ŭ 1938 hodzie dapamahli dapamahali Vienhryja i Polšča. U 2014 hodzie Rasija nie maje sajuźnikaŭ u spravie padziełu Ukrainy. Navat aficyjny Miensk hołasna nie padtrymaŭ svajho dabradzieja i sajuźnika.
Zachapiŭšy ŭ 1939-m Čechiju i Maraviju, ustanaviŭšy nad imi pratektarat, Hitler stvaryŭ nibyta niezaležnuju Słavackuju dziaržavu. Pucinu naŭrad ci ŭdasca stvaryć maryjanietkavuju Paŭdniova-Uschodniuju Ukrainu. Pahatoŭ jamu ciapier užo nie ŭdasca ŭstanavić pratektarat nad Centralnaj i Zachodniaj Ukrainaj.
Hitler učyniaŭ anšlus Sudetaŭ pry ŭsieahulnaj padtrymcy ŭčadziełaha ad nacysckaj prapahandy niamieckaha naroda. Kali chtości ź niemcaŭ na terytoryi faterlanda i razumieŭ usiu niebiaśpieku hetaha kroku dla samoj Hiermanii, dyk musiŭ maŭčać. U pucinskaj Rasii ŭsio ž jość ludzi, jakija nie paddalisia ŭsieahulnamu ačmureńniu i zambavańniu, jakoje viadzie aficyjnaja prapahanda. Jany navat nie bajacca vychodzić na vulicy i płoščy, kab prademanstravać svaju niazhodu ź dziaržaŭnaj palitykaj. Hetyja ludzi razumiejuć niebiaśpieku palityki, jakuju viadzie pucinski režym, pierš za ŭsio dla samoj Rasii.
Chielsinkski akt pachavany
Pucin nie atrymaŭ i nie atrymaje aficyjnaj zhody zachodnich demakratyj na dałučeńnie Kryma da Rasii. Nieaficyjnuju zhodu jon užo atrymaŭ. Zachad nie zdoleŭ rašuča strymać ahresara.
Aktam ahresii ŭ dačynieńni da Ukrainy Rasija pierakreśliła Zaklučny akt Narady ab jeŭrapiejskaj biaśpiecy i supracoŭnictvie ŭ Chielsinkach (1975) i zamacavany ŭ im pryncyp nieparušnaści dziaržaŭnych miežaŭ. Sama ž Arhanizacyja biaśpieki i supracoŭnictva ŭ Jeŭropie pieratvaryłasia ŭ niepatrebnuju instytucyju, źniknieńnia jakoj nichto nie zaŭvažyć.
Novy Afhanistan. Patreba ŭ novym Rejhanie
Chielsinkski Akt, jak viadoma ličycca, simvałam palityki razradki napružnaści (detanty, entšpanunhu) u adnosinach pamiž Uschodam i Zachadam. Z momantu jaho pachavańnia ahladalniki i analityki kažuć pra niepaźbiežnaść kali nie Treciaj suśvietnaj, dyk novaj chałodnaj vajny.
Palityka razradki napružanaści pamiž Uschodam i Zachadam davała efiekt da peŭnaj miery. Nie sakret, što pad razmovy ab razradcy da pačatku 1980-ch balšaviki praktyčna razhramili dysidencki ruch u SSSR. Jaho pravadyry byli vysłanyja abo na Zachad (jak Alaksandr Sałžanicyn), abo ŭ rasijskuju hłybinku (jak Andrej Sacharaŭ), astatnija ž dysidenty (jak Laŭko Łukjanienka) apynulisia ŭ łahierach abo znachodzilisia pad kaŭpakom HB.
Pad razmovy ab razradcy SSSR vioŭ honku ŭzbrajeńniaŭ i ažyćciaŭlaŭ palityčnuju ekspansiju. Pa-mojmu, rasijskuju akcyju ŭ Krymie niedastatkova paraŭnoŭvać z hitleraŭskaj palitykaj u Sudetach. Davajcie paraŭnajem jaje z uviadzieńniem savieckich vojskaŭ u Afhanistan.
Uviadzieńnie «abmiežavanaha kantynhienta» ŭ Afhanistan pakłała pačatak kanca Savieckaha Sajuza. Ale kab impieryja raspałasia, patrebny byŭ Ronald Rejhan, jaki ŭhołas nazvaŭ SSSR impieryjaj zła.
Zachadu para ŭśviadomić, što pucinskaja Rasija – takaja ž impieryja zła, jak i SSSR. My bačym, jak rasijskaja ŭłada hromić apazicyju ŭnutry krainy i ŭsio bolš ahresiŭna pavodzić siabie na mižnarodnaj arenie. Vidavočna, što raniejšaja palityka Zachadu ŭ dačynieńni da aficyjnaj Rasii dała zboj, raźviazała ruki reakcyjnym siłam.
Prezident Barak Abama ździejśniŭ stratehičnuju pamyłku, kali vyrašyŭ «pierazahruzić» adnosiny pamiž ZŠA i aficyjnaj Rasijaj. Na źmienu sučasnamu «hołubu» Džymi Karteru ŭ asobie Abamy u Bieły dom pavinien pryjści novy Ronald Rejhan. Mnohim nie padabałasia sacyjalnaja daktryna hetaha palityka, rejhanomika, ale mnohim padabałasia jahonaja pryncypovaść i ćviordaść u adnosinach da impieryi zła. Aficyjnaja Rasija pryznaje tolki siłu. I ŭ vostryja momanty razmaŭlać ź joju treba tolki z pazicyi siły.
Novyja vykliki dla Rasii i Zachad
Davodziłasia čuć, što dla viadzieńnia ahresiŭnaj palityki Rasija maje nievyčarpalnyja resursy. Heta pierabolšańnie. Nikoha nie pavinna padmanuć maskoŭskaja iluminacyja. Rasija pa-raniejšamu zastajecca biednaj krainaj.
Toje, što ź inicyjatyvy Biła Klintana «syravinnaja impieryja» trapiła ŭ adnu kampaniju ź Vialikaj siamiorkaj, – nonsens i z ekanamičnaha, i palityčnaha hledzišča. Rasiju tolki čałaviek z chvoraj fantazijaj moža zaličyć u šerah ekanamična raźvitych demakratyčnych krain. Tamu pieršym krokam lideraŭ Zachadu ŭ dačynieńni da pucinskaj Rasii pavinna być viartańnie da Vialikaj siamiorki. I vydatna było b, kali b sioletniaja sustreča lideraŭ Siamiorki adbyłasia, jak taho žadajuć ukrainskija habrei, u Kijevie. Ci advažycca Zachad na taki žest i krok?
Novaja Krymskaja vajna ŭžo abyšłasia Rasii ŭ mnohija miljardy dalaraŭ. Załožnik traŭmavanaj rasijskaj psichiki, apantany impierskimi ambicyjami, pucinski režym płacić šmatmiljardnuju daninu svaim satrapam na Paŭnočnym Kaŭkazie za ich łajalnaść. Jamu davodzicca ŭtrymlivać za košt biednych rasijskich rehijonaŭ svaju kreaturu ŭ Abchazii, Paŭdniovaj Asiecii i Prydniastroŭi. Štohod jon vydatkoŭvaje nie mienš jak šeść miljardaŭ dalaraŭ na padtrymku łukašenkaŭskaha režymu ŭ Biełarusi. Ciapier u pucinskaj Rasii moža źjaviŭsia novy klijent – kryminalny krymski režym.
I źjaviacca novyja prablemy: abo źmirycca z novaj Ukrainaj, ad jakoj zaležyć enierha- i vodazabieśpiačeńnie Kryma, abo naładžvać pastaŭki enierhii i vady na paŭvostraŭ z kantynientalnaj Rasii praz mora. U dadatak Rasii daviadziecca mieć spravy nie tolki z ukrainskaj hramadoju Kryma – z 250-tysiačnym krymskatatarskim narodam, a praź jaho – ź isłamskim śvietam. A kali ŭziać pad uvahu «prablemu 2014» – vyvad vojskaŭ NATO z Afhanistana i, jak nastupstva, aktyvizacyju isłamistaŭ u Tadžykistanie, Uźbiekistanie dy inšych krainach Siaredniaj Azii, a taksama ŭ isłamskich rehijonach samoj Rasii?
Tym časam biednaj Rasii nakanavana biadnieć. Surjoznyja analityki-ekanamisty ŭ adzin hołas śćviardžajuć, što rasijskaja ekanamičnaja madel siabie vyčarpała, što rasijskaja ekanomika płaŭna sa stadyi stahnacyi pierachodzić u stadyju recesii. Da taho ž mnohija śćviardžajuć, što rasijskaja ekanamičnaja i palityčnaja madel, jak i savieckaja, nie paddajecca refarmavańniu. Ci nie pradrakaje heta Rasii los Savieckaha Sajuza? Užo i Hryhoryj Jaŭlinski adkryta kaža ab jaje nieminučym raspadzie.
Z druhoha boku, «syravinnaja impieryja» pastupova tracić ryčahi ŭpłyvu na Zachad.
«Słancavaja revalucyja», adkryćcio radoviščaŭ hazu ŭ Polščy, technałahičny prahres – usio heta dy inšaje dajuć mažlivaść Štatam i Jeŭropie ŭziać inšuju tanalnaść u razmovie z Rasijaj.
Jašče raz: pucinski režym, jak i balšavicki, pavažaje siłu i pryncypovaść. Ale Zachadu dla taho, kab vieści razmovy z hetym režymam u novaj tanalnaści, patrabujecca novy Ronald Rejhan.
