U Biełarusi dazvoleny lizinh fizičnym asobam
Alaksandr Łukašenka padpisaŭ ukaz, jakim nadzialiŭ Nacbank paŭnamoctvami pa rehulavańni lizinhavaj dziejnaści i dazvoliŭ udzielničać u lizinhavych apieracyjach fizičnym asobam.
Jak paviedamiła pres-słužba prezidenta, kiraŭnik dziaržavy padpisaŭ 25 lutaha Ukaz №99 «Ab pytańniach rehulavańnia lizinhavaj dziejnaści», jakoha ŭžo daŭno čakaŭ rynak lizinhu ŭ Biełarusi. Usie novaŭviadzieńni, praduhledžanyja dakumientam, byli čakanyja i nie prynieśli niepryjemnych siurpryzaŭ. Choć sam dakumient budzie dastupny dla detalovaha analizu krychu paźniej, kamientary da ŭkaza vyklikajuć aptymizm u hulcoŭ rynka.
Pavodle tłumačeńnia pres-słužby kiraŭnika dziaržavy, ukaz pryniaty z metaj pavyšeńnia ekanamičnaj efiektyŭnaści vykarystańnia instrumientaŭ lizinhu, źnižeńnia ryzyk, źviazanych ź lizinhavaj dziejnaściu, i zabieśpiačeńnia prazrystaści dziejnaści lizinhavych kampanij. I hetym razam heta padobna da praŭdy.
Tak, dakumient akreślivaje paradak i ŭmovy ažyćciaŭleńnia lizinhavaj dziejnaści, uklučajučy zaklučeńnie damovaŭ lizinhu i sublizinku, a taksama miery pa ažyćciaŭleńni kantrolu i nahladu za praviadzieńniem dadzienaj dziejnaści.
Čakajecca, što z ustupleńniem u siłu ŭkaza rynak lizinhu ŭ Biełarusi źviedaje źmieny i krychu ŭciśniecca.
Heta adbudziecca ŭ vyniku taho, što ciapier lizinhavuju dziejnaść buduć mieć prava ažyćciaŭlać tolki kampanii, uklučanyja Nacyjanalnym bankam u rejestr lizinhavych arhanizacyj. Usie astatnija zmohuć taksama pracavać, ale ŭ istotna ŭrezanym varyjancie — pry ŭmovie zaklučeńnia ŭ hod nie bolš čym troch damovaŭ lizinhu na sumu nie bolš za 10 tysiač bazavych vieličyń. Pry hetym majomaść u lizinh zmohuć davać navat indyvidualnyja pradprymalniki. Nacbank taksama nadzieleny paŭnamoctvami pa rehulavańni lizinhavaj dziejnaści ŭ Biełarusi i kantrolu za jaje ažyćciaŭleńniem lizinhavymi arhanizacyjami.
Istotnyja pasłableńni robiacca dla bankaŭ i kredytna-finansavych arhanizacyj, jakija zmohuć, jak i raniej, ažyćciaŭlać lizinhavuju dziejnaść u adpaviednaści z Bankaŭskim kodeksam i inšymi zakanadaŭčymi aktami biez uklučeńnia ŭ rejestr Nacbanka.
Ale hałoŭnaje novaŭviadzieńnie ŭ tym, što ciapier mahčymaść pradstaŭleńnia lizinhavymi arhanizacyjami majomaści ŭ finansavuju arendu (lizinh) mahčymaje ŭ tym liku i fizičnym asobam, čaho raniej nie było.
Dakumient ustupić u siłu z 1 vieraśnia 2014 hoda.
