Skandalny rasijski miljarder stanie biełaruskim vice-premjeram? Piać faktaŭ pra Dźmitryja Maziepina

Ukrainskaja redakcyja rasijskaha infarmacyjnaha ahienctva RBK paviedamiła, što ŭ bližejšyja dni novym vice-premjeram Biełarusi moža być pryznačany rasiejski aliharch Dźmitryj Maziepin, bahaćcie jakoha aceńvajecca na $1,7 miljarda. Infarmacyju pra heta nibyta pieradała krynica ŭ administracyi Alaksandra Łukašenki. Kampanija «Urałchim», jakuju ŭznačalvaje Maziepin, paśpieła abvierhnuć navinu. Paśla hetaha kijeŭskija žurnalisty svajo paviedamleńnie vydalili.

«Naša Niva» na ŭsialaki vypadak sabrała piać cikavych faktaŭ pra patencyjnaha vice-premjera.

Uradženiec Minska

Niahledziačy na svaju rasiejskaść, Maziepin naradziŭsia ŭ Minsku, u 1968 hodzie. Kali raźvivać kanśpirałahičnuju viersiju, heta mahło b jamu dazvolić bałatavacca ŭ prezidenty Biełarusi.

U 1985 jon zakončyŭ Minskaje suvoraŭskaje vučylišča, a paśla vučyŭsia na vajskovaha pierakładčyka. U 1986–1988 Maziepin słužyŭ u Afhanistanie, ale ŭ bajavych dziejańniach udziełu nie braŭ.

Paśla vajny Maziepin asieŭ u Rasii, pastupiŭ na ekanamičny fakultet MHIMA. Razvał SSSR jon sustreŭ u jakaści finansista, stvaralnika strachavoj kampanii «Infistrach».

U 1993–1995 Maziepin viarnuŭsia nienadoŭha ŭ Biełaruś, uznačaliŭšy adnu ź filijaŭ «Biełarusbanka».

Paśla hetaha skački z pasady na pasadu praciahnulisia — bank «Falkon», «Roznaimpart», Ciumienskaja naftavaja kampanija, «Nižnievartaŭsknaftahaz», bank «Fłora-Maskva», Rasijski fond fiederalnaj majomaści… U hetych šaści roznapłanavych arhanizacyjach Maziepin papracavaŭ na praciahu piaci hadoŭ.

U Fondzie fiederalnaj majomaści narešcie pryjšło supakajeńnie. Jon dasłužyŭsia da pasady pieršaha namieśnika staršyni.

Jaho kiraŭnikom byŭ Uładzimir Malin, adzin ź fihurantaŭ spravy Chadarkoŭskaha.

Sumnieŭny šlach da bahaćcia

U 2002 Maziepin sychodzić na pasadu prezidenta kampanii «Sibur», padkantrolnaj «Hazpramu». Praz hod jaho adtul zvolnili, adnak jon paśpieŭ vyvieści sa składu kampanii azotnuju pramysłovaść.

Paśla doŭhich pieraprodažaŭ i bankructvaŭ roznych jurydyčnych asobaŭ aktyvy apynulisia ŭ rukach Maziepina.

Jany stali asnovaj chimičnaj kampanii «Urałchim», staršynioj rady dyrektaroŭ jakoha ŭ 2007 staŭ mienavita Maziepin.

Prazrystaści ŭ rasijskim biznesie tych časoŭ brakavała.

«Urałchim» tady nabiraŭ ni čym nie zabiaśpiečanyja kredyty, a na atrymanyja hrošy skuplaŭ inšyja pradpryjemstvy.

Kali Maziepinym zacikavilisia siłavyja struktury, jon staŭ rychtavać šlachi da adstupleńnia.

Pierśpiektyva emihracyi

U 2009 hodzie ŭ Łatvii było zarehistravana daččynaje pradpryjemstva «Urałchima», praź jakoje musili kantralavacca dachody kampanii. Nieŭzabavie ŭ Ryzie zapracavała aficyjnaje pradstaŭnictva.

Maziepin tym časam źbiraŭsia nabyvać darahija hateli ŭ Jurmale.

Pahavorvali i pra jahony intares da futbolnaha kłuba «Skonta».

Vyvad aktyvaŭ za miažu jašče macniej razzłavaŭ siłavikoŭ. Adnak Maziepin ich pryhoža pieramoh. Adzin z deputataŭ abłasnoha zakanadaŭčaha schodu Kiraŭskaj vobłaści raptoŭna admoviŭsia ad mandatu.

Maziepin padmitusiŭsia, staŭ deputatam ad «Adzinaj Rasii» i aŭtamatyčna atrymaŭ niedatykalnaść.

Sponsar rasijskaj apazicyi?

Imia Dźmitryja Maziepina zaśviaciłasia ŭ dobrym dziasiatku inšych ćmianych historyj. U pryvatnaści, u mnohich rasijskich ŚMI

jaho nazyvajuć «apazicyjnym» aliharcham i sponsaram masavych akcyj rasijskaj apazicyi.

Pryčym «novamu Chadarkoŭskamu» prypisvajuć finansavańnie i radykalnych «levych», i łahodnaj «Spraviadlivaj Rasii» dy nacyjanalistaŭ. Ličyŭsia jon i sponsaram art-hrupy «Vajna» — toj samaj, ź jakoj vyraśli aktyvistki Pussy Riot.

Maziepin na ŭsialaki vypadak praciahvaje žyć na dva damy — Rasiju i Łatviju.

Ułady prybałtyjskaj krainy jakraz vydali jamu dazvoł na budaŭnictva terminału dla pieravałki minieralnych uhnajeńniaŭ.

Biełaruskija pierśpiektyvy

Pavodle infarmacyi RBK, u biełaruskim uradzie Maziepin maje adkazvać za ŭzajemaadnosiny z Rasijaj.

Uciamnaha tłumačeńnia, navošta patrebny dadatkovy čałaviek, nie pryvodzicca. Nibyta ŭ bližejšy čas budzie dasiahnuta damoŭlenaść ab vydzialeńni Biełarusi dadatkovaha kredytu pamieram $3 miljardy na apłatu rasijskich enierhanośbitaŭ. Pra heta taksama nie było nijakaj infy ź inšych krynic.

Adnak u lubym razie Maziepin nie vyhladaje čałaviekam, nabližanym da siońniašniaha Kramla, jakomu b Pucin i Łukašenka daručyli kantralavać šmatmiljardnyja ŭhody.

Mahčyma, havorka idzie pra źliŭ infarmacyi z metaj naškodzić samomu Maziepinu.

Jahor Marcinovič

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH