Праваабаронцы прызналі палітвязнем студэнта Арцёма Баярскага. У Беларусі такіх ужо 370
18 красавіка пасля адбыцця 25 сутак адміністрацыйнага арышту за ўдзел у мірным сходзе супрацоўнікамі МУС быў затрыманы студэнт БДУ Арцём Баярскі. На яго завялі крымінальную справу і выставілі абвінавачванні па ч. 1 арт. 361-1 КК (Стварэнне экстрэмісцкага фармавання). Арцём быў змешчаны пад варту ў СІЗА №1.
Арцём заявіў свайму адвакату аб тым, што 24 сакавіка ён быў нібыта падвергнуты катаванням з боку супрацоўнікаў МУС.
Праваабаронцы прызналі яго палітычным вязнем. Цяпер такіх людзей у Беларусі 370.
Нагадаем, 24 сакавіка ў інтэрнаце БДУ затрымалі 20-гадовага студэнта Арцёма Баярскага. У студэнцкіх чатах абмяркоўваліся абставіны затрымання хлопца: «Суседзяў — на падлогу і ў кайданкі, але забралі толькі Арцёма». Суд над Арцёмам прайшоў у Доме Правасуддзя, дзе яго пакаралі 25-сутачным арыштам.
Раней Арцёма Баярскага ўжо арыштоўвалі на 15 сутак за ўдзел у масавым мерапрыемстве, таму, магчыма, ён мог трапіць пад «зачыстку» перад Днём Волі.
