Фазэль прызнаў, што цяпер у Беларусі мала шанцаў прыняць ЧС па хакеі
Прэзідэнт Міжнароднай федэрацыі хакея прызнаў, што ў Беларусі амаль няма шанцаў прыняць чэмпіянат свету ў 2021 годзе.
president.gov.by
Для пачатку Рэнэ Фазэль у інтэрв'ю Sportchau растлумачыў сутнасць ягоных фотаздымкаў з Аляксандрам Лукашэнкам і Дзмітрыем Баскавым.
«Мае сумесныя фотаздымкі з Лукашэнкам былі няправільна патлумачаныя. Абмеркаванне ішло ў зусім іншым ключы — я прыехаў не для таго, каб выпіць з ім гарэлкі. Нашай мэтай было знайсці разам з Лукашэнкам вырашэнне пытання», — сказаў Фазэль.
Фота Арцёма Каркоцкага
Генеральны сакратар IIHF Хорст Ліхтнер, у сваю чаргу, дадаў, што ім было гарантавана, што фатаграфіі не патрапяць у прэсу.
Што тычыцца фатаграфій з Дзмітрыем Баскавым, то, па словах Фазэля, старшыня Беларускай федэрацыі хакея папрасіў яго аб сумесным здымку.
«Я і выказаць здагадку не мог, што ён будзе выкладаць іх у публічны доступ. У такіх сітуацыях разумееш, што табой маніпулююць», — адзначыў Фазэль.
Далей кіраўнік IIHF распавёў пра змест размовы з Аляксандрам Лукашэнкам.
«Мы не вылучалі ніякіх патрабаванняў, а толькі прапаноўвалі розныя рашэнні сітуацыі. Большасць з іх была прынята. Таксама мы закранулі арганізацыйныя пытанні. Урэшце, мы адпраўляемся ў краіну, дзе на вуліцы выходзяць сотні тысяч людзей, таму трэба мець гарантыі бяспекі. Быць упэўненымі, што арэна не будзе абложаная. Гульцы, заўзятары, журналісты павінны быць у бяспецы.
Акрамя гэтага, варта разумець, што ў Беларусі некалькі іншае стаўленне да каранавіруса. Але нас запэўнілі, што падчас турніру будуць выконвацца сусветныя стандарты.
І, нарэшце, мы закранулі палітычныя пытанні. Ад апазіцыі даведаліся, што ў краіне 165 палітвязняў.
З гэтым пытаннем мы звярнуліся да Лукашэнкі, але ён адразу сказаў, што гэтыя людзі сядзяць за парушэнне закона. Падчас дэманстрацый шмат чаго адбылося. Міліцыя нападала на людзей, але і з таго боку былі розныя ўчынкі. Лукашэнка сказаў, што адказвае за бяспеку ў яго краіне, што гэта яго праца і ён будзе яе працягваць.
Пасля гэтага мы перайшлі да тэмы Канстытуцыі і выбараў. Але зразумейце, як IIHF мы не можам вылучаць палітычных патрабаванняў, таму мы проста спрачаліся. Настолькі канструктыўна, наколькі гэта з ім магчыма.
Мы прыляцелі, каб зрабіць нешта добрае. Аб чым мы павінны шкадаваць? Мы маглі б проста напісаць, але замест гэтага прыехалі і сказалі: «Аляксандр, у нас праблема». Мы проста спартыўная арганізацыя, якая імкнецца выканаць сваю працу — арганізаваць чэмпіянат свету ў Беларусі, — сказаў Фазэль.
Цяпер Рэнэ Фазэль вельмі нізка ацэньвае шанцы правесці чэмпіянат свету ў Мінску.
«Зрабіць гэта будзе вельмі, вельмі складана. Павінны адбыцца цуд. Вядома, мы не будзем прымаць такое рашэнне на эмоцыях. Цяпер мне трэба крыху адпачыць. Хорст жа зоймецца аналізам плана Б», — сказаў Фазэль.
