У Драгічынскім раёне 16-гадоваму падлетку, які сарваў чырвона-зялёны сцяг, далі шэсць месяцаў хатняй хіміі
spring96.org
Суд Драгічынскага раёна разгледзеў крымінальную справу 16-гадовага Аляксандра Несцерука, якога абвінавацілі ў здзеку з дзяржаўных сімвалаў (370 Крымінальнага кодэкса). Справу разглядаў старшыня суда Лявонцій Станкевіч, паведамляе spring96.org.
Згодна з абвінавачваннем, Аляксандр Несцярук 7 лістапада знаходзіўся на ганку Дома культуры гарадскога пасёлка Антопаль і «наўмысна сарваў дзяржаўны сцяг», знішчыўшы пры гэтым дрэўка коштам 10 рублёў.
Малады чалавек віну прызнаў часткова: дрэўка сапраўды зламалася, але здзекаў са сцягу не было. Матэрыяльную шкоду кампенсаваў.
У выніку да хлопца ўжылі прымусовыя меры выхаваўчага характару: абмежаванне волі на 6 месяцаў. З 22 гадзін вечара да 6 гадзін раніцы дня ён павінен знаходзіцца па месцы жыхарства і павінен з'яўляцца раз на месяц для рэгістрацыі ў орган, які ажыццяўляе кантроль за яго паводзінамі.
