У Віцебску жанчына забыла ў платнай прыбіральні кашалёк, а касірка яго вярнула, але грошы прысабечыла
Здарэнне адбылося 29 кастрычніка на чыгуначным вакзале, куды 32-гадовая віцяблянка прыйшла праводзіць маці, паведамляе абласная міліцыя.
Праз паўгадзіны жанчына выявіла, што няма кашалька, і падумала, што забыла яго ў прыбіральні. Забытую на ўмывальніку рэч выявіла іншая наведвальніца і перадала касірцы. У выніку тая вярнула партманэ гаспадыні.
Праўда, радавалася віцяблянка нядоўга: хтосьці выцягнуў з кашалька 140 рублёў, залатыя завушніцы і кулон на 450 рублёў. Касір адмаўляла сваю датычнасць да крадзяжу, таму жанчына звярнулася ў міліцыю.
— Пасля апытання ўдзельнікаў здарэння і аднаўлення агульнай карціны сышчыкі прагледзелі запісы з камер відэаназірання. Там было відаць, як касірка забірае грошы з кашалька і выходзіць у службовае памяшканне. Нічога з выкрадзенага ў падазраванай не аказалася, таму акцэнт быў зроблены на пільны агляд пакоя персаналу, — распавёў Вадзім Глячкоў, начальнік Віцебскага АУС на транспарце.
У выніку каштоўнасці і грошы аператыўнікі знайшлі ў вазоне, які жанчына схавала пад крэсла. Яна прызналася, што спачатку захоўвала ўсё з сабой, а калі даведалася пра намер пацярпелай звярнуцца ў праваахоўныя органы, вырашыла схаваць чужую маёмасць.
