Даслаць навіну
Знайсці
11.06.2019 / 16:36 4

Стваральніца брэнда жаночай бялізны — супрацоўнікам: Калі ў вас дрэнны настрой, не прыходзьце на працу

Амаль тры гады таму Ганна Драгацэнная вырашыла, што не хоча быць проста дызайнеркай і працаваць на кагосьці. Маладая амбіцыйная жанчына падумала, што з яе можа атрымацца выдатны бізнэсоўца.

Павялічыць выяву

Ганна Драгацэнная.

«Дакладней, да гэтага мяне падштурхнуў мой муж. Ён заўважыў, што мае сукенкі карыстаюцца попытам, і спытаў, ці змагу я распрацаваць мадэлі для масавай вытворчасці. Я сказала, што змагу. Вырашылі паспрабаваць. І, здаецца, у нас атрымалася», — расказвае Ганна.

Сёння жаночую бялізну брэнда «Драгацэнная» можна купіць ва ўсіх гарадах Беларусі. Таксама бялізну ад Ганны могуць набыць жанчыны ў Расіі, Літве, Казахстане. У бліжэйшых планах — пашырыць вытворчасць, бо ўжо сёння 12 супрацоўнікаў фізічна не спраўляюцца з замовамі. Пакупніцы ўсё часцей патрабуюць новых рэчаў, шануючы іх за якасць, сучаснасць і, канечне ж, за невысокі кошт.

Павялічыць выяву

Павялічыць выяву

Ганна Драгацэнная па адукацыі дызайнер. Скончыла Беларускую дзяржаўную акадэмію мастацтваў. І бізнэсу, прызнаецца жанчына, ёй давялося вучыцца самой, з нуля.

«Ведаеце, вось шмат хто скардзіцца, што ў Беларусі вельмі цяжка мець сваю справу, што бюракратыя, тоны папер і адпіскі адбіваюць усю ахвоту працаваць. Дык вось гэта не так. Калі ты арганізаваны, калі ведаеш, што робіш, то ў Беларусі зможаш развіваць бізнэс. У кожнай дзяржаўнай установе пакажуць і раскажуць як правільна арганізаваць свой бізнес. У мяне, прынамсі, ніколі не ўзнікала пытанняў, у якім кірунку рухацца. Заўсёды былі побач людзі, гатовыя дапамагчы, падказаць, як лепей зрабіць», — дзеліцца Ганна.

Гандлёвую марку «Драгацэнная» Ганна зарэгістравала адразу пасля таго, як скончыла Акадэмію. Гэта не творчы псеўданім дызайнеркі, а сапраўднае прозвішча.

«Магу і пашпарт паказаць», — запэўнівае яна.

Павялічыць выяву

«Яшчэ калі я вучылася ў акадэміі, падумала пра тое, што трэба зарэгістраваць сваё прозвішча як марку. Ну таму што прозвішча запамінальнае. Нельга было аддаваць гатовы брэнд у чужыя рукі. А з прозвішчам у мяне ўзнікалі розныя казусы, — прыгадвае Ганна. — Неяк у чарзе акурат перада мной паклікалі мужчыну з прозвішчам Жамчужны. А мяне — за ім. Уяўляеце? Пасля Жамчужнага — Драгацэнная. Уся чарга смяялася».

Ганна кажа, што калі рэгістравала сваю гандлёвую марку, нават уявіць не магла, што пад ёй будзе выпускаць жаночую бялізну. Пачыналася ўсё з вечаровых сукенак.

Павялічыць выяву

Начныя кашулі брэнда «Драгацэнная».

Павялічыць выяву

Вечаровыя сукенкі насілі адзінкі, а хацелася, каб мая марка была даступнай ўсім беларускам

«Я з дзяцінства добра малявала і марыла быць дызайнерам адзення. Паступіла ў Акадэмію мастацтваў, стала вучыцца. Яшчэ студэнткай перамагла ў «Млыне моды — 2008». Пасля шмат ездзіла па Еўропе з паказамі сваіх сукенак, удзельнічала ў конкурсах. Мяне запрасілі на тэлебачанне шыць уборы вядучым, рабіла сукенкі Алёне Ланской. Дарэчы, з яе і пачаўся мой шлях у беларускі шоу-бізнэс. Алёна заўсёды расказвала, у сукенку якога дызайнера апранутая, было шмат замоў, мой почырк сталі пазнаваць.

А пасля я зразумела, што ўперлася ў столь. Пашыта безліч сукенак, мяне пазнаюць, я шмат удзельнічаю ў паказах. А што далей? Да таго ж, сукенкі шыліся ў адным экзэмпляры. Іх насіла адна жанчына, а бачылі яшчэ чалавек 50. Мне ж хацелася маштабу, хацелася апрануць усіх беларусак. Вывучыла рынак, і аказалася, што прыгожых і элегантных начных кашуль акурат не стае. Вырашыла займацца жаночай бялізнай: халатамі, начнушкамі. І ўсё з натуральнай бавоўны», — распавядае дызайнерка.

Павялічыць выяву

Без цяжкасцяў у адкрыцці новага бізнэсу не абышлося.

«Гэта сёння ў нас свая вытворчасць, на нас працуюць людзі, а пачыналі мы з супрацоўніцтва з фабрыкамі. Плацілі ім за тое, што яны ў сябе шылі бялізну пад нашым брэндам. Пасля, калі продажы павялічыліся, нам адмовілі, маўляў, не спраўляюцца. А пасля мы ўбачылі, што фабрыка стала выпускаць бялізну па маіх лякалах пад сваёй назвай. Гэта было вельмі крыўдна. У гэтым плане мы заканадаўствам не абароненыя зусім. Дастаткова да чужой мадэлі прышыць кішэню, напрыклад, і ўсё, гэта лічыцца іншай рэччу. А ведаеце, як гэта чапляе, калі бачыш у краме сваю прыдумку, але пад іншым брэндам?» — абураецца Ганна.

Сваю справу Ганна пачынала з банкам «Дабрабыт». Хоць прапаноў для бізнэсу і ў той час хапала, паверыла дызайнерка менавіта гэтаму банку.

«Мы з «Дабрабытам» працуем ад самага першага дня, як пачалі сваю справу. У іх вельмі добрая падтрымка бізнэсу, таму і аддалі ім перавагу. Працуем і не можам нарадавацца. За некалькі гадоў банк не падвёў ніводнага разу», — адзначае ўласніца брэнда «Драгацэнная».

Калі ў вас свой бізнэс:

Банк «Дабрабыт» мае спецыяльную праграму падтрымкі жаночага бізнэсу і крэдытуе мікраарганізацыі, малы і сярэдні бізнэс на выгадных умовах. Прадпрымальніцы могуць узяць крэдыт на 11 год пад 5,5% гадавых.

Пры атрыманні крэдыту на суму $100 000 на 11 год штомесячны плацёж з улікам працэнта — $1216. 

Клікніце, калі хочаце даведацца больш пра праграму.

Павялічыць выяву

Адзіны шлях да поспеху — працаваць

Працоўны дзень у Ганны пачынаецца а 7-й гадзіне раніцы, а заканчваецца амаль апоўначы.

«А інакш нельга. Ведаеце, мне аднойчы муж сказаў, што ёсць тры шляхі стаць паспяховым і багатым. Першы — атрымаць спадчыну, другі — мець мегамозг, ну як Біл Гейтс, напрыклад. А трэці шлях — гэта працаваць і працаваць. Крок за крокам будаваць сваю мару. Наш шлях — трэці. І яшчэ вельмі важна разбірацца ў тым, што ты робіш. У мяне, напрыклад, нават няма свайго дырэктарскага кабінета. На працы я працую. Мне няма калі сядзець за сталом. Калі трэба сесці за швейную машынку, я сядаю. Калі трэба ўзяцца за прас — бяруся. Я сама працую з пастаўшчыкамі, бо я ведаю, якая тканіна і якія карункі мне патрэбныя».

Павялічыць выяву

Усе мадэлі Ганна прыдумвае з нуля.

«Я малюю мадэль спачатку ў сваёй галаве. Пасля пераношу на паперу, затым шыю адзін экзэмпляр, гляджу, як мадэль будзе выглядаць на тканіне. Калі мяне ўсё задавальняе, запускаем у вытворчасць. Але, ведаеце, ніколі немагчыма спрагназаваць, якая рэч спадабаецца пакупнікам. Я памятаю, як радавалася, калі здабыла тканіну з бавоўны тэракотавага колеру. Думала, што гэта будзе бомба. А ў выніку? Мадэлі гэтага колеру да сёння ляжаць на складзе».

Самы бяспройгрышны варыянт, дзеліцца Ганна Драгацэнная, — гэта начныя кашулі чорнага колеру з карункамі. Такія рэчы на паліцах доўга не затрымліваюцца.

Павялічыць выяву

Павялічыць выяву

Адной з пераваг свайго брэнду Ганна лічыць тое, што яны гатовыя задавальняць патрабаванні сваіх кліентаў.

«Мы сочым за каментарамі, якія пакідаюць нам на нашых старонках у інтэрнэце. Адказваем на ўсе пытанні. Калі ў нашых сілах палепшыць нашыя рэчы, мы гэта робім», — расказвае Ганна.

Ключавое слова ў бізнэсе — парадак

Што значыць «сакрэт поспеху», Ганна не ведае.

«Няма ніякіх сакрэтаў. Мне здаецца, што ключавое слова ў паспяховым бізнэсе — гэта парадак. Для нас нават прыход праверкі — гэта як прыход доўгачаканых гасцей. Просяць любую паперку, а ў нас яна ёсць. Мы своечасова праходзім сертыфікацыю, плацім падаткі і выплачваем заробкі. Нашы супрацоўнікі ведаюць, што ўсё, чаго мы ад іх патрабуем, — гэта акуратнасці і ўважлівасці на працоўных месцах. Мы не гонімся за колькасцю рэчаў, якую павінны зрабіць швачкі за змену. Мы просім якасці і парадку. Дрэнны настрой і стомленасць — гэта паважныя прычыны, каб не прыходзіць на работу. Ну як будзе працаваць чалавек, які стомлены, у дрэнным настроі? Ён паўдня будзе спрабаваць узяць сябе ў рукі! Прыйдзе раздражнёны і сваім настроем выб’е з каляіны тых, хто працуе побач. Таму лепш хай адпачне, прыйдзе ў сябе. А на працы трэба працаваць», — упэўненая дырэктарка.

Павялічыць выяву

Павялічыць выяву

У бліжэйшых планах брэнда «Драгацэнная» — пашырыць вытворчасць.

«Я не ведаю, што будзе далей. Магчыма, будзем выпускаць дзіцячаю бялізну, магчыма, пашырым жаночы асартымент. Але я дакладна ведаю, што буду рабіць гэта ў Беларусі. Я не ведаю, ці патрыятызм гэта, але калі ў Расіі і Казахстане ў першую чаргу пытаюцца пра беларускія рэчы (бо ведаюць, што беларускія рэчы — гэта якасна і сучасна), то гэта гонар і жаданне працаваць яшчэ больш старанна. Я вельмі хачу, каб за мяжой Беларусь пазнавалі не толькі па трактарах і бульбе, а і па якасным сучасным адзенні».

Не так даўно брэнд «Драгацэнная» хацела выкупіць замежная фірма, прапаноўвалі вялікія грошы.

«Мара не прадаецца, адказала я ім», — падсумоўвае Ганна Драгацэнная.

Павялічыць выяву

Наталля Тур, фота Волі Афіцэравай

0
Владимир123 / адказаць
12.06.2019 / 15:44
Хорошая скрытая реклама банка добрабыт.
6
Вясковы Лірнік / адказаць
12.06.2019 / 22:52
Дзякуй за матэрыял. Хай шчасціць гэтым людзям. Давайце падтрымаем іх сваімі грашыма. Гэта будзе найлепшы знак павагі.
0
Максим Дизайнер / адказаць
14.06.2019 / 12:02
Какие наши девочки на фото молодцы.
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2018 2019 2020
май чэрвень ліпень
ПН АЎ СР ЧЦ ПТ СБ НД
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30