Беларусы вярнуліся ў эліту сусветнага хакея. У тым ліку дзякуючы хлопцам з «Пагоняй» на швэдрах
Фота ФХБ
Зборная Беларусі (галоўны трэнер — Андрэй Сідарэнка) пасля кароткачасовага перабывання ў першым дывізіёне вярнулася ў эліту сусветнага хакея, дзе нашы хакеісты знаходзіліся пастаянна з 2004 па 2018 гады. Пры тым, што турнір у Нур-Султане яшчэ не скончаны: у нядзелю пройдуць заключныя гульні.
Пасадзейнічалі датэрміноваму вяртанню беларусаў літоўцы — тыя самыя, хто гуляе на турніры ў прыгожых швэдрах з Пагоняй на грудзях. Літоўцы сёння перамаглі Паўднёвую Карэю і выключылі іх з барацьбы.
У дзвюх пазасталых гульнях — з Казахстанам і Карэяй — беларусам дастаткова было набраць адзін бал. Г.зн. можна было прайграць у авертайме. Што і здарылася сёння.
Асноўны час матча Беларусь — Казахстан скончыўся з лікам 2:2 (прычым нашы саступалі 0:2), беларусы і казахстанцы — у эліце.
У авертайме нашы саступілі 2:3, але ягоны вынік ні на што не паўплываў.
Казахстан, дарэчы, трэніруе беларус Андрэй Скабелка, экс-трэнер нашай зборнай.
Казахстан — 11, Беларусь — 10, Карэя — 6, Венгрыя, Славенія, Літва — 3.
Заўтра Беларусь гуляе з Карэяй. Гэты матч нічога не вырашае.
***
У 2020 годзе чэмпіянат свету пройдзе ў Швейцарыі. У 2021-м — у Мінску і Рызе. Г.зн. беларусы ў 2020 годзе ніякім чынам з эліты не змогуць выбыць.
