Каля адміністрацыі Маскоўскага раёна больш ніколі не будзе затораў
На праспекце Дзяржынскага ў Мінску стала менш затораў. Гэта ўдалося зрабіць дзякуючы рэканструкцыі скрыжавання з 2-м завулкам Розы Люксембург.
Павярнуць налева тут не атрымаецца.
Раней каля будынка адміністрацыі Маскоўскага раёна існавала скрыжаванне ў выглядзе літары «Т». З 2-га завулка Розы Люксембург можна было павярнуць як направа, у бок да Грушаўкі і Малінаўкі, так і налева — у цэнтр.
Левыя павароты стваралі пэўнае напружанне, бо прымушалі спыняцца на чырвонае святло ўвесь паток машын па праспекце Дзяржынскага.
Цяпер жа левыя павароты на праспект Дзяржынскага і з праспекта Дзяржынскага забаронены.
Прычым не толькі знакамі, але і канструктыўна. Рабочыя ужо выклалі плітку на месцы ранейшай раздзяляльнай зоны.
Аўтамабілі, якім трэба выехаць з Грушаўкі ў цэнтр Мінска, змогуць скарыстацца новай развязкай, якая будзе адкрыта ў сярэдзіне мая.
Хто застаўся ў мінусе ад новаўвядзення, дык гэта кліенты гатэля «Рэнесанс». Каб пад'ехаць да яго з боку цэнтра, трэба будзе разварочвацца на скрыжаванні каля гарадской ДАІ.
