Дэлегацыя ўрада наведала Венесуэлу і ўзяла ўдзел у інаўгурацыі Мадура
Беларуская дэлегацыя на чале з намеснікам прэм'ер-міністра Ігарам Ляшэнкам знаходзіцца з афіцыйным візітам у Венесуэле, паведамляе прэс-служба ўрада.
Ігар Ляшэнка 10 студзеня прыняў удзел ва ўрачыстай цырымоніі ўступлення на пасаду прэзідэнта Нікаласа Мадура.
У гэты ж дзень адбылася сустрэча Ігара Ляшэнкі і Нікаласа Мадура, на якой кіраўнік беларускай дэлегацыі перадаў віншаванні кіраўніку венесуэльскай дзяржавы з нагоды яго афіцыйнага ўступлення на пасаду.
Ляшэнка таксама сустрэўся ў Каракасе з віцэ-прэзідэнтам Венесуэлы па пытаннях планавання, старшынёй венесуэльскай часткі беларуска-венесуэльскай сумеснай камісіі па гандлёва-эканамічным супрацоўніцтве Рыкарда Менендэсам.
Цікава, што на цырымоніі інаўгурацыі Мадура не прысутнічалі прадстаўнікі ЗША, ЕС і 13 краін у Лацінскай Амерыцы, якія не прызнаюць легітымнасці выбараў.
Праз канфлікт прэзідэнта з Нацыянальнай асамблеяй Мадура прынёс прысягу не перад парламентам, а ў будынку Вярхоўнага суда Венесуэлы.
Мадура перамог на прэзідэнцкіх выбарах у маі 2018 года, атрымаўшы 68% галасоў выбаршчыкаў пры яўцы 46%. Парламент Венесуэлы абвінаваціў палітыка ва ўзурпацыі ўлады і парушэннях. Вынікі выбараў не прызналі некалькі краін, у тым ліку ЗША, Аргенціна, Чылі і Перу.
