Паліцыя апублікавала ВІДЭА, як беспілотны аўтамабіль Uber насмерць збіў чалавека
У панядзелак, 19 сакавіка, у горадзе Тэмпе, штат Арызона, беспілотны аўтамабіль кампаніі Uber збіў жанчыну, якая пераходзіла дарогу. Яна памерла. Паліцыя штата паказала відэазапісы ўнутранай і вонкавай камер аўтамабіля.
На відэа бачна, як у цёмны час сутак аўтамабіль едзе па дарозе, і раптам перад ім з'яўляецца жанчына з роварам у руках. Машына яе не заўважае, працягвае рухацца далей з той жа хуткасцю і збівае пешахода.
У другой частцы відэа паказана рэакцыя адзінага пасажыра, які знаходзіўся на пярэднім сядзенні.
Увага! Відэа можа падацца шакуючым для некаторых гледачоў!
Відавочна, заўважыць пешахода ў гэтым выпадку было б цяжка нават кіроўцу: жанчына з'явілася з цемры раптоўна і зусім не глядзела па баках.
У каментарыях да відэа многія карыстальнікі YouTube лічаць, што жанчына вінаватая сама: штодня ў свеце праз уласнаю няўважлівасць гіне не адзін пешаход незалежна ад таго, мае месца аварыя з беспілотным аўтамабілем, ці з традыцыйным.
Між тым, кампанія Uber заявіла аб спыненні выпрабаванняў беспілотных аўтамабіляў ва ўсіх гарадах ЗША.
