Трамп хоча прыватызаваць МКС
Адміністрацыя прэзідэнта ЗША Дональда Трампа плануе да 2025 года прыватызаваць Міжнародную касмічную станцыю (МКС), пераўтварыўшы яе ў прыватнае камерцыйнае прадпрыемства. Пра гэта ў нядзелю, 11 лютага, паведамляе газета The Washington Post са спасылкай на ўнутраны дакумент NASA.
Белы дом мае намер спыніць фінансаванне МКС, але не збіраецца адмаўляцца ад арбітальнай станцыі і распрацоўвае план яе пераводу ў прыватны сектар. «Рашэнне спыніць прамую федэральную падтрымку МКС ў 2025 годзе не азначае, што сама станцыя будзе вернутая з арбіты да таго часу», — прыводзіць выданне цытату з дакумента.
Паводле інфармацыі The Washington Post, чакаецца, што ў праекце бюджэту на 2019 фінансавы год (пачынаецца ў ЗША з 1 кастрычніка), які павінны апублікаваць 12 лютага, адміністрацыя Трампа запытае 150 мільёнаў даляраў на развіццё «камерцыйных структур і магчымасцяў» для забеспячэння прыватызацыі МКС. Паводле ацэнкі выдання, планы Белага дома, верагодна, сутыкнуцца з крытыкай у Кангрэсе, таму што ЗША патрацілі амаль 100 мільярдаў даляраў на будаўніцтва і абслугоўванне станцыі.
