Tramp choča pryvatyzavać MKS
Administracyja prezidenta ZŠA Donalda Trampa płanuje da 2025 hoda pryvatyzavać Mižnarodnuju kaśmičnuju stancyju (MKS), pieraŭtvaryŭšy jaje ŭ pryvatnaje kamiercyjnaje pradpryjemstva. Pra heta ŭ niadzielu, 11 lutaha, paviedamlaje hazieta The Washington Post sa spasyłkaj na ŭnutrany dakumient NASA.
Bieły dom maje namier spynić finansavańnie MKS, ale nie źbirajecca admaŭlacca ad arbitalnaj stancyi i raspracoŭvaje płan jaje pieravodu ŭ pryvatny siektar. «Rašeńnie spynić pramuju fiederalnuju padtrymku MKS ŭ 2025 hodzie nie aznačaje, što sama stancyja budzie viernutaja z arbity da taho času», — pryvodzić vydańnie cytatu z dakumienta.
Pavodle infarmacyi The Washington Post, čakajecca, što ŭ prajekcie biudžetu na 2019 finansavy hod (pačynajecca ŭ ZŠA z 1 kastryčnika), jaki pavinny apublikavać 12 lutaha, administracyja Trampa zapytaje 150 miljonaŭ dalaraŭ na raźvićcio «kamiercyjnych struktur i mahčymaściaŭ» dla zabieśpiačeńnia pryvatyzacyi MKS. Pavodle acenki vydańnia, płany Biełaha doma, vierahodna, sutyknucca z krytykaj u Kanhresie, tamu što ZŠA patracili amal 100 miljardaŭ dalaraŭ na budaŭnictva i absłuhoŭvańnie stancyi.
