БДУ далучыўся да Вялікай хартыі еўрапейскіх універсітэтаў
Беларускі дзяржаўны ўніверсітэт далучыўся да Вялікай хартыі еўрапейскіх універсітэтаў, паведамляецца на сайце ВНУ.
Далучэнне БДУ да хартыі спрыяе рэалізацыі прынцыпаў Еўрапейскай прасторы вышэйшай адукацыі, аптымізуе працэс інтэграцыі ўніверсітэта ў міжнародную адукацыйную сістэму, адзначылі ў Белдзяржуніверсітэце.
Цырымонія падпісання адбылася ў час міжнароднай канферэнцыі «Універсітэцкія каштоўнасці для сённяшняга дня: цэнтральна-еўрапейскія перспектывы і праблемы» ў Печскім універсітэце ў Венгрыі. Усяго хартыю на форуме падпісалі 11 ВНУ, у тым ліку Гомельскі дзяржаўны ўніверсітэт імя Ф. Скарыны.
Вялікая хартыя еўрапейскіх універсітэтаў прынятая ў Балонні (Італія) у 1988 годзе ў азнаменаванне 900-годдзя Балонскага ўніверсітэта. Мэта дакумента — уніфікацыя адукацыйных сістэм, палітыкі развіцця еўрапейскай універсітэцкай супольнасці.