Брытні Спірс ізноў пятнаццаць

Можна было б сказаць, што папса — гэта яна сама, калі б не цалкам рок-н-рольны лад жыцця: алкагалізм, лячэнне ад наркаманіі, псіхушка і Джастын Тымберлэйк, адпраўлены далёка-далёка.

Сваю зорную кар’еру Брытні Спірс пачынала ў школьным баптысцкім хоры

ў родным Маккомбе (штат Місісіпі). Вядомай яе яшчэ ў падлеткавым веку зрабіла амерыканскае шоу «Новы клуб Мікі Маўса», дзе яна пачынала разам з Крысцінай Агілерай і згаданым ужо Тымберлэйкам.

Яе дэбютны сінгл «…Baby One More Time» (1998) меў шалёны поспех і разышоўся ў свеце накладам у 9 млн копій. Прыкладна на столькі ж, відаць, вырасла і колькасць новапафарбаваных бландзінак-старшакласніц. Апроч таго

Брытні наважылася на смелы для сучаснага шоу-бізнэсу крок: дэкларавала, што будзе захоўваць цнатлівасць да шлюбу.

І яе 

сінгл «Oops!… I Did It Again» (2000) усталяваў абсалютны рэкорд. Продажы за першы тыдзень склалі 1 319 193 копіі.

Толькі праўдаруб Эмінем з часам здолеў так перавыканаць план. Хоць і не абяцаў устрымлівацца да шлюбу.

Брытні была заўважаная і ў кіно. І не толькі ў аўтабіяграфічным. У фільме Майкла Мура «Фарынгейт 9/11», каментуючы вайну ў Іраку,

яна зрабіла заяву цалкам у духу Ірыны Дарафеевай: «Я думаю, што мы павінны давяраць нашаму прэзідэнту ў кожным рашэнні

, падтрымліваць яго і верыць у яго».

У 2003-м Спірс атрымала Грэмі, пасля чаго яе кар’ера пакацілася па нахіленай. Дакладней, на працу рэзка перастала хапаць часу: два шлюбы адзін за адным (першы працягнуўся ўсяго 55 гадзін), нараджэнне дваіх дзяцей, сумнеўныя сябры (адна кабалістка Мадонна чаго вартая), язда без правоў, шпіталь, прызнанне недзеяздольнай, апека…

Хто б мог думаць, што Брытні скажа «не» таблеткам і кілішку?

Валявым намаганнем яна скінула лішнія кг і вярнулася на сцэну з альбомам Blackout.

Але за час яе адсутнасці падрасло новае пакаленне гераінь падлеткавых мрояў.

І перакіс вадарода больш не вабіць мільёны. Шалёнага поспеху не было. Альбом раскупілі былыя фанаты. У гэтым ёсць і плюс. Дакладней, гарантыя эканамічнай стабільнасці для Спірс і яе сям’і: яны будуць настальгічна любіць і купляць сінглы Брытні яшчэ доўгія-доўгія гады.

У 2011-м на MTV Video Music Awards

Брытні Спірс, сімвалічна, атрымала спецыяльную прэмію імя Майкла Джэксана «Прызнанне пакалення».

Яшчэ адно прызнанне пакалення — выява Брытні Спірс ёсць у музеі васковых фігур мадам Цюсо.

Магчыма, так бы выглядала і жыла Мэрылін Манро, калі б нарадзілася ў 1981-м.

Яўген Квач

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ