У Літве прапануюць усім грамадзянам рэгістравацца ў ваенныя камендатуры мірнага часу. На выпадак вайны
Зарэгістраваныя асобы будуць запрашацца на вучэнні ў складзе вайсковых частак ваенных камендатур ад 3 да 10 дзён у годзе. Падчас вучэнняў плануецца забяспечваць узбраеннем і экіпіроўкай.
«Абаронім сваю сям'ю, горад, краіну» абвяшчаецца на плакаце. karys.lt
У сераду ў краіне пачалася рэгістрацыя грамадзян, якія жадаюць унесці свой уклад у абарону дзяржавы і набыць ваенныя навыкі, у каменданцкія часткі мірнага часу, піша Delfi.lt.
Як паведаміла Міністэрства абароны, людзі ўсіх спецыяльнасцяў і адукацыі, якія жадаюць падрыхтавацца да абароны краіны і атрымаць базавыя вайсковыя веды, да 31 жніўня могуць зарэгістравацца, запоўніўшы форму на сайце karys.lt, або ў бліжэйшым падраздзяленні Службы воінскага абавязку і камплектавання. Зарэгістраваныя асобы будуць запрашацца на вучэнні ў складзе вайсковых частак ваенных камендатур ад 3 да 10 дзён у годзе. Падчас вучэнняў плануецца забяспечваць узбраеннем і экіпіроўкай.
У выпадку вайны грамадзяне, уключаныя ў спісы камендатур і якія атрымалі воінскія навыкі, будуць дапамагаць абараняць свой горад ці раён, ахоўваць важныя аб'екты ў жылым асяроддзі, пасты кантролю, забяспечваць захаванне каменданцкай гадзіны, удзельнічаць у працэсе рэквізіцыі маёмасці, сачыць за навакольным асяроддзем, змагацца з незаконнымі ўзброенымі фарміраваннямі або выконваць іншыя задачы, пастаўленыя Літоўскай арміяй.
У мірны час каменданцкія часці будуць запоўненыя прафесійнымі вайскоўцамі, прылічанымі прызыўнікамі падрыхтаванага рэзерву, каменданцкімі стрэлкамі Саюза стралкоў і грамадзянскімі асобамі. У мірны час іх ваенную падрыхтоўку будуць забяспечваць добраахвотніцкія сілы аховы краю.
Плануецца, што ваенная падрыхтоўка ў воінскіх часцях ваенных камендатур пачнецца ў кастрычніку. Структура ваенных камендатур у мірны час будзе створана на аснове Службы вайсковага абавязку і камплектавання літоўскага войска і ўжо існуючых камендатур.
