Польшча перастала прапускаць у Беларусь легкавыя аўтамабілі на транзітных нумарах
Абмежаванні закранулі маркі BMW і канцэрна VAG.
Аўто на транзітных нумарах. Фота: Першы
Пра тое, што польскія памежнікі перасталі прапускаць на тэрыторыю Беларусі аўтамабілі на транзітных нумарах, аб'ём рухавіка якіх перавышае 1900 куб. см, паведамляе выданне Telegraf.news.
Пра сітуацыю распавялі тыя, хто ў ноч з пятніцы на суботу спрабаваў правезці аўтамабілі з краін ЕС у Беларусь.
Па словах сведак ніякай інфармацыі пра змены на мяжы не было. Абмежаванні зкранулі маркі BMW і канцэрна VAG: Volkswagen, Audi, Seat, Škoda і інш.
Уладальнікі павінны паказаць на мытні дакумент ад вытворцы, які пацвярджаў бы права на экспарт легкавога транспарту за межы Еўрасаюза.
Паводле крыніцы, дакумент таксама мусіць змяшчаць інфармацыю пра тое, што вытворца ведае прадаўца і пакупніка. Акрамя таго, здзелка не павінна выглядаць як спроба абыходу санкцый.
Як паведамляюць сведкі, перагоншчыкі некалькіх дарагіх майбахаў паспелі праскочыць мяжу да 24 гадзін 22 сакавіка. Фота: Першы
Прадстаўнік кампаніі Westmotors, якая з'яўляецца найбуйнейшым пастаўшчыком аўто з-за мяжы, паведаміў, што ўначы 24 сакавіка на КПП «Цярэспаль» прыехаў міністр транспарту Польшчы. Ён распарадзіўся не прапускаць у краіны ЕАЭС аўтамабілі з аб'ёмам рухавіка звыш 1900 куб. см, а таксама тыя аўто, якія каштуюць звыш 50 000 еўра.
«…Як толькі мы атрымаем больш дэталёвую інфармацыю пра тое, як ідуць справы з праходам граніцы з санкцыйнымі аўтамабілямі, — паведамім вам. Важны момант: гэта не тычыцца аўтамабіляў з ЗША, якія ідуць у Беларусь праз літоўскую граніцу», — напісалі ў сацыяльных сетках прадстаўнікі кампаніі Westmotors.
Вядома, што Еўрасаюз увёў 11-ы пакет санкцый супраць Расіі яшчэ 23 чэрвеня 2023 года. Сярод розных абмежаванняў, была і забарона на пастаўку ў Расію новых і ўжываных машын з аб'ёмам рухавіка звыш 1900 куб. см, а таксама электрамабіляў і гібрыдаў.
Дакумент быў апублікаваны і набыў моц. Еўрасавет таксама ўключыў у пакет санкцый механізм «барацьбы з іх абыходам», які дазволіць уводзіць абмежаванні супраць трэціх краін.
Чытайце таксама:
Літва спыніла пропуск грузавых машын з Калінінградскай вобласці
