Маск прыбыў з неабвешчаным візітам у Кітай
Па даных Reuters, прыватны самалёт з Маскам прызямліўся ў Пекіне 28 красавіка. Аб планах бізнэсмена наведаць Кітай публічна не абʼяўлялася. Візіт Маска супадае з аўтасалонам у Пекіне, які працягнецца да 4 мая, але ў Tesla няма стэнда на аўташоу.
Ілан Маск. Фота: AP Photo / Ebrahim Noroozi
Паводле крыніц Reuters, Маск мае намер сустрэцца з кітайскімі чыноўнікамі, каб абмеркаваць разгортванне праграмнага забеспячэння для цалкам аўтаномных аўтамабіляў (FSD) у Кітаі. Ён таксама хоча атрымаць дазвол на перадачу за мяжу даных, якія збіраюцца ў Кітаі.
Па словах галіновых экспертаў, складаныя ўмовы дарожнага руху ў Кітаі з вялікай колькасцю пешаходаў і веласіпедыстаў забяспечваюць больш сцэнарыяў для навучання алгарытмаў аўтаномнага ваджэння больш хуткімі тэмпамі.
FSD — самая сучасная версія праграмнага забеспячэння для аўтапілота ў машынах Tesla. Кампанія яшчэ не зрабіла яе даступнай у Кітаі, нягледзячы на заклікі кліентаў. Раней Маск заявіў, што Tesla можа разгарнуць FSD у Кітаі «вельмі хутка».
Tesla прадала ў Кітаі больш за 1,7 млн аўтамабіляў з таго часу, як выйшла на рынак у гэтай краіне дзесяць гадоў таму. З 2021 года кампанія захоўвае ўсе даныя, сабраныя яе аўтамабілямі, у Шанхаі, як таго патрабуюць кітайскія органы, і не перадае іх у ЗША. У Шанхаі таксама размешчаны завод Tesla.
Чытайце таксама:
Ілан Маск анансаваў выхад рабатызаванага таксі Tesla
Сорамна, што беларусы працягваюць выкарыстоўваць цэтлікі камуністычнай (савецкай) і затым расейскай прапаганды. Ну, але "можа так і трэба".