У Аўстрыі маці трымала дзіця на холадзе ў клетцы для сабак. Яе абвінавачваюць у замаху на забойства
У Аўстрыі 32-гадовая жанчына знаходзіцца пад следствам за катаванні і спробу забойства свайго 12-гадовага сына, якога яна замкнула ў маленькай сабачай клетцы. Яна таксама трымала яго на холадзе і марыла голадам.
Фота: Heinz-Peter Bader / AP
Пра гэтую справу стала вядома некалькі дзён таму, і яна ўжо выклікала хвалю абурэння ў краіне, як піша Бі-бі-сі.
Жанчына знаходзіцца пад вартай з лістапада ў горадзе Крэмс, на паўночным захадзе ад Вены. Паліцыя затрымала яе пасля таго, як работнік сацыяльнай службы забіў трывогу.
У паліцыю звярнуўся і бацька дзіцяці, які жыве асобна ад сям'і.
Хлопчыка знайшлі ў каматозным стане, з тэмпературай цела ўсяго 26,8°С, ён быў блізкі да смерці пасля некалькіх месяцаў катаванняў, пра гэта паведаміў Ёхан Баўмшлагер, прадстаўнік паліцыі правінцыі Ніжняя Аўстрыя.
Дзіця тэрмінова даставілі ў бальніцу, а яго маці на наступны дзень арыштавалі.
Па словах Баўмшлагера, жанчыну падазраюць у тым, што яна штодня па некалькі разоў аблівала хлопчыка халоднай вадой і на некалькі гадзін адчыняла вокны кватэры пры нізкай тэмпературы паветра.
Ён дадаў, што фізічна дзіця ўжо аднавілася, але яго псіхалагічны стан пакідае жадаць лепшага.
У канцы мая Вярхоўны суд адхіліў скаргу маці на ўтрыманне пад вартай цягам некалькіх месяцаў.
Чакаецца, што расследаванне працягнецца да канца лета, затым жанчыне выставяць абвінавачванні.
Чытайце таксама:
«Ён зараз сустракаецца з Богам». У Мілане развіталіся з Сільвіа Берлусконі
