Са столі Парыжскай оперы патрабуюць прыбраць фрэскі Марка Шагала
Спадкаемцы французскага мастака Жуля-Эжэна Леневё патрабуюць прыбраць са столі Парыжскай оперы фрэскі работы Марка Шагала, якія ўпрыгожваюць будынак з 1964 года, паведамляе тэлеканал BF MTV. Рэч у тым, што пад фрэскамі хаваецца роспіс Леневё.
Фрэскі Марка Шагала ў Парыжскай оперы
«Мы просім, каб мы маглі, нарэшце, убачыць столь, якую Леневё распісаў у 1875 годзе. З 1964 года яна была схаваная пад столлю Шагала, запланаванай як здымная канструкцыя», — заявіў адвакат праваўладальнікаў і заснавальнік «Асацыяцыі сяброў Леневё».
Фрэска Марка Шагала, створаная па замове Андрэ Мальро, тагачаснага міністра культуры Францыі, сапраўды здымная. Яна напісаная на панэлях з поліэфірнай смалы. Гэтая работа, якая падвяргалася раней сур'ёзнай крытыцы з-за сваёй сучаснасці, што кантрастуе з класіцызмам гэтага месца, цяпер сусветна вядомая.
Спадчыннікі Леневё, поўныя рашучасці зрабіць так, каб іх галасы былі пачутыя, арганізуюць мітынг 9 мая, каб паспрабаваць пераканаць Міністэрства культуры і кіраўніцтва Оперы.
Аднак шанцаў у іх няшмат. «Ідэя дэпаніравання працы Шагала, якая з'яўляецца вельмі сімвалічным элементам Гранд-оперы, выклікала б сур'ёзныя пытанні і не стаіць на парадку дня», — заявіў Марцін Айдары, намеснік генеральнага дырэктара Парыжскай оперы.
Чытайце таксама:
Беларуская рада культуры пачала кампанію па адвакацыі беларускага мастацтва за мяжой. Першы — Шагал
Шагал, Суцін, Бакст… Што зрабіць, каб свет пачаў іх лічыць выхадцамі з Беларусі?
